Partia Demokratike e Fierit ka reaguar lidhur me arrestimin e Marin Lekës për blerjen e votave në këmbim të 500 eurove. Sipas PD-së së Fierit bëhet fjalë për sajesë të turpshme nga ana e SHISH.

Duke u distancuar nga krimi elektoral, PD bën thirrje që SPAK të hetojë menjëherë rastin dhe të vendosë para përgjegjësisë këdo që ka shkelur ligjin.

“Sajesat e turpshme si të Sigurimit të Shtetit as na ndikojnë, as na shfokusojnë nga misioni ynë për të bërë më të mirën për Shqipërinë. Ne distancohemi nga çdo krim elektoral dhe jemi në krye të betejës kundër shkeljeve të ligjit në zgjedhje.

Manipulimet e opinionit publik të kryer nga Policia e Shtetit, një bandë në shërbim të Belinda Ballukut, duhet të marrin përgjigje nga Prokuroria e Posaçme. SPAK duhet të hetojë menjëherë rastin dhe të vendosë para përgjegjësisë cilindo që ka shkelur ligjin.

Ne kemi besim të plotë tek SPAK për zbardhjen e këtij rasti, ku po keqpërdoret Policia e Shtetit për propagandë bajate kundër PD.

Sajesa e trashë, qesharake dhe e turpshme e Policisë së Shtetit është bërë për llogari të PS dhe Belinda Ballukut për të zhurmuar krimin elektoral të detyrimit të administratës për të marrë pjesë në miringjet e PS. 35 fletëthirrje janë dërguar tek strukturat e Partisë Socialiste për krime zgjedhore vetëm ditën e djeshme për këtë krim elektoral. Ne inkurajojmë Prokurorinë e Posaçme që të vijojë punën për goditjen e çdo krimi zgjedhor në qarkun Fier”- thuhet në reagimin e PD. Versus.al

Muharrem Toska, qytetarit që i ishin premtuar 500 euro në këmbim të votës për PD-në në Lushnjë, ka bërë vetë denoncimin në polici.

Ai tha para oficerëve se ishte ndjerë i penduar pas premtimit për shitjen e votës dhe prandaj e kishte bërë denoncimin në polici.

Marin Leka i kishte premtuar 500 euro dhe i kishte marrë kartën e Identitetit. Menjëherë pas ngjarjes, Toska kishte bërë kallëzim në polici dhe çështja i kaloi SPAK-ut për krime zgjedhore.

Në kontrollin që iu bë Lekës, iu gjet karta e ID të Muharrem Toskës. Versus.al

Momenti i arrestimit të 38 vjeçarit

Fier- Një 38 vjeçar në Lushnjë, i identifikuar si Marin Leka është arrestuar nga policia pasi akuzohet për korrupsion aktiv në zgjedhje.

Mësohet se Leka i kishte premtuar 500 mijë lekë të vjetra një personi për t’i blerë votën në favor të Partisë Demokratike në zgjedhjet e 11 majit. Policia ka sekuestruar kartën e ID të personit të cilit i ishin premtuar shuma parash për votën.

“Specialistët për Hetimin e Krimeve të Komisariatit të Policisë Lushnjë arrestuan në flagrancë shtetasin M. L., 38 vjeç, banues në Lushnjë, për veprat penale “Korrupsioni aktiv në zgjedhje" dhe “Marrja dhe përdorimi i paligjshëm i dokumentit të identifikimit”.

Nga hetimet e kryera në bashkëpunim me Prokurorinë e Fierit, dyshohet se shtetasi M. L. i ka marrë një shtetasi, kartën e identitetit, si dhe i ka premtuar dhënien e një shume parash, dyshohet me qëllim blerjen e votës në favor të një subjekti politik, pjesëmarrës në zgjedhjet parlamentare të datës 11.05.2025”- njofton policia.

Dosja hetimore i kalon SPAK-ut në kuadër të task-forcës së ngritur nga Prokuroria e Posaçme për parandalimin dhe ndëshkimin e krimeve zgjedhore. Versus.al