Janë zbardhur diskutimet me dyer të mbyllura në mbledhjen e Këshillit Kombëtar të PD-së.

Në fillim ishte menduar që protesta të mbahej në datën 6 tetor, të kishte bllokim të akseve në të të gjithë Shqipërinë.

Por më pas kjo datë u ndërrua dhe u vendos që data e nisjes së aksionit opozitar të jetë 7 tetori.

Sekretari i Përgjithshëm i kësaj partie, Flamur Noka u ka lënë detyrë të gjithë kryetarëve të degëve të angazhohen për pjesmarrje, të takohen me anëtarët dhe të harrojnë komunikimet me grupet e whatsupp.

Sipas Nokës opozita është në luftë dhe nuk është luksi që të njoftohen dhe të angazhohen përmes kësaj mënyre.

“Ideja e parë ka qenë  bllokim aksesh ndaj ishte data 6 si fillim. Të gjithë kryetarët e degëve të angazhohen për pjesëmarrje. Takohuni me anëtarët, harroni  komunikimet me grupet ëhatsapp. Ne jemi në luftë. Nuk kemi luksin të njoftohemi dhe të angazhohemi përmes kësaj mënyre. Nuk është serioze.

Të respektojmë këdo që do të ftojmë në protestë. T’i takojmë. Degët e Tiranës duhet të jenë në terren çdo ditë. Anëtarët e Këshillit Kombëtar dhe deputetët duhet të shpërndahen në zona. Jemi në luftë , t’i përgjigjemi me disiplina të hekurt. Nuk ka kthim pas. Të mos e mendoje kush. O fitore, o vetëm fitore”,është shprehur Noka./Versus.al

Kryetari i Partisë Demokratike, Sali Berisha gjatë fjalës së tij në Këshillin Kombëtar u ka kërkuar të tijve të bëhen gati për “luftë” dhe rezistencë deri në qeveri teknike.

''Rama ka instrumente për të na burgosur, por ne kemi instrumente që me guximin tonë, e paralizojmë anekënd vendit këtë qeveri armike të të drejtave, dinjitetit.

Sot koha të përdorim këto instrumente, të hidhemi në sulm me mjetet e mosbindjes civile, rezistencë pa kthim deri në fitore, por presim udhëheqjen dhe mobilizimin tuaj.

Ndaj kjo mbledhje është thirrur për t’u rënë borive të betejës, për përgjigjen tonë më 7 tetor, o sot o kurrë, të paralizohet qeveria deri në qeveri teknike. Është radha jonë dhe ne do i qëndrojmë”, është shprehur Berisha. 

Më pas kreu i PD-së shtoi se 7 tetori është dita e vendimtare për lirinë e shqiptare dhe ftoi çdo qytetar dhe në emigracion që të jenë pjesë e kësaj beteje.

Berisha: Beteja më 7 tetor është beteja e jetës sonë. 7 tetori është dita e shqiptarëve. 7 tetori është dita e të rinjve shqiptarë. 7 tetori është dita e burrave dhe grave të Shqipërisë, dita e pensionistëve shqiptarë, dita e drejtësisë, dita e triumfit, dita e fitores.

Ndaj dhe ftoj edhe njëherë çdo qytetar shqiptar, ftoj të gjithë shqiptarët në emigracion dhe kudo që janë të nisim së bashku betejën vendimtare për fatin e Shqipërisë.

Vendimtare për lirinë e shqiptarëve./Versus.al

Partia Demokratike ka ndërruar datën e protestës mbarë kombëtare e cila ishte e  parashikuar të mbahej më datë 6 tetor.

Ky vendim u bë i ditur gjate mbledhjes së Këshillit Kombëtar të PD-së, ku deputeti i PD-së, Edi Paloka bëri me dije se se protesta do të nisë të hënën, 7 tetor në orën 18:00 para kryeministrisë dhe më pas do të shtrihet në të gjithë rrugët e Tiranës.

Vendimi i Këshillit Kombëtar të Partisë Demokratike:

Rendi kushtetues ka rënë dhe balanca mes pushteteve është asgjesuar.

Në Shqipëri, një person i vetëm, Kryeministri, ka grumbulluar çdo pushtet në duart e tij.

Ka asgjesuar zgjedhjet e lira dhe të ndershme, përmes bllokimit prej 11 vjtësh të një Reforme Zgjedhore kuptimplotë, duke mos reflektuar asnjë prej Rekomandimeve të OSBE-ODIHR. Shkelja e barazisë së palëve në zgjedhje dhe mohimi i të drejtës për Qeveri asnjanëse Teknike për zgjedhjet e ardhshme, synojnë deformimin e vullnetit të qytetarëve dhe pengimin me forcë të rotacionit politik.

Edi Rama përdor Parlamentin, drejtësinë dhe mediat për të ruajtur pushtetin e tij personal dhe për të rrënuar ekonomikisht qytetarët shqiptarë.

Maxhoranca në Parlament refuzon me votë të zbatojë vendimet e Gjykatës Kushtetuese për dorëzimin e bashkëpunëtorëve të tij përpara drejtësisë.

Lideri i opozitës dhe Kryetari i Partisë Demokratike Sali Berisha mbahet në arrest shtëpie antikushtetues prej gati një viti përmes një dosje të fabrikuar nga PS, pa fakte, pa dëshmitarë, duke e penguar me forcë dhe pa ligj aktivitetin e tij politik.

Eurodeputeti Fredi Beleri u zgjodh duke qenë në burg, pasi u arrestua dy ditë para zgjedhjeve, pas një fushate publike deniguese nga kryeministri dhe pas një fitorje të pritshme të tij si kryebashkiak. Ndaj tij nuk u paraqit asnjë provë dhe nuk u lejua të betohej pas fitores së zgjedhjeve, sepse kryeministri e sheh Jugun e Shqipërisë si një pronë private për t’u pasururar përmes korrupsionit.

Këtë javë, nënkryetari i Grupit Parlamentar të PD, deputeti Ervin Salianji, u burgos në një proces gjyqësor politik, sepse denoncoi lidhjet e trafikantëve të drogës me qeverinë shqiptare, përkatësisht të vëllait të ministrit të brendshëm. Burgosja e një deputeti pa ligj dhe prova është mesazh politik për heshtjen e opozitës, asgjesimin e saj dhe ekzekutimin e lirisë së shprehjes.

Për këtë arsye, Këshilli Kombëtar i Partisë Demokratike:

Ditën e hënë, datë 7 Tetor 2024, ora 18:00, fton qytetarët shqiptarë të bëhemi të gjithë bashkë në Tiranë, për të reaguar kundër padrejtësive me autor të vetëm Edi Ramën. Mospajtimi me padrejtësinë është mision i çdo qytetari të ndershëm shqiptar. Mospajtimi me të keqen fillon nga Kryeministria dhe shtrihet atë ditë në të gjithë rrugët e Tiranës./Versus.al

Kreu i Partisë Demokratike, Sali Berisha ka mbajtur fjalën hapëse, teksa demokratët kanë mbledhur sot Këshillin Kombëtar si një masë për planifikimin e hapave të radhës së opozitës pas arrestimit të Ervin Salianjit.

Berisha gjatë fjalës së tij u shpreh se Salianji ishte nga ata të rinj të guximshëm që zgjodhi të mbrojë të vërtetën dhe interesin e  çdo qytetari të këtij vendi.

''Ervin Salianji ishte dhe është një nga ata të rinj guximtarë që midis të vërtetës dhe përuljes, nënshtrimit, pazareve me kriminelët në pushtet, zgjodhi të mbrojë të vërtetën.

Zgjodhi të mbrojë interesin e çdo qytetari të këtij vendi dhe jo vetëm të Shqipërisë.

Mafia nuk ka kufi, mafia nuk ka atdhe, ajo është një rrezik jo vetëm për një komb, por po kaq edhe për kombe të tjera.

Mirëpo, kur deputetët e opozitës burgosen se denoncojnë krimin e organizuar, vetiu shtrohet pyetja: kush do i mbrojë qytetarët, kush do i mbrojë fëmijët etyre, kush do jetë avokati i aspiratave të tyre, kush do përballet publikisht me trafikantët, me gjobëvënësit, me kriminelët?'' u shpreh kreu i PD-së.

Berisha u shpreh gjithashtu se burgosja e Salianjit ishte deklarata e fundit e luftës kundrejt Partisë Demokratike nga ana e qeverisë.

Berisha: Unë kam besim shumë tek ADN-ja e shqiptarëve, ndaj dhe bëj sot një thirrje, në radhë të parë opozitës, së pari demokratëve, burgosja e Salianjit ishte deklarata e fundit e luftës që Edi Rama shpalli ndaj nesh.

Por ne jemi të vërtetë, ne jemi realistë, Edi Rama na ka bërë ne jo një, po disa deklarata lufte gjer sot.

Vjedhja e flamurit të PD tre vite më parë, ishte një deklaratë lufte ndaj qindra mijëra demokratëve që u përkiste ai flamur.

Burgosja e liderit të opozitës pa asnjë fakt, provë, vetëm e vetëm se e dinë se nuk mund të fitonte më kurrë zgjedhje të tjera, ishte një deklaratë lufte ndaj qindra mijëra demokratëve që e kishin zgjedhur me votë kryetarin e tyre./Versus.al