Gjatë prezantimit të programit të PD-së, Sali Berisha, i bëri thirrje Edi Ramës të ndalojë përdorimin e emrave të shenjta kombëtarë për të fshehur korrupsionin dhe vjedhjet e qeverisë së tij. Ai theksoi se Edi Rama ka përfituar dhe ka mbuluar vjedhjet e shumë anëtarëve të qeverisë. 

"Edi Rama, mos përdor emrin e Zotit.
Mos përdor emrin e Skënderbeut.
Mos përdor emrin e Ismail Qemalit.
Mos përdor flamurin dhe himnin kombëtar për të mbuluar vjedhjet e shpifura të Belinda Ballukut, vjedhjet e Edi Ramës, vjedhjet e Erion Veliajt, vjedhjet e Gjiknurit, e Beqës, Kokës.
Vjedhjet pra të ekipit që hajnave që i solle Shqipërisë dhe e rope këtë vend 12 vite me radhë.
Mos i përdor këta emra, se me asgjë nuk mbulon dot vjedhjet e tyre.
Edi Rama, populli të ka braktisur.
Shqipëria dhe bota e pa sheshin bosh.
Shqipëria dhe bota i pa përsëri ministret e tua me lukse dhe superluks, me aksesorë dhjetëra mijëra euroshe teksa gëzonin luksin e tyre.
Kurse ti nuk the asnjë fjalë për qytetarin, për të rinjtë, për pensionistët, për të sëmurët, për shqiptarët.
U përpoqe të joshësh shqiptarët me mirëqenien e Europës.
Në fakt edhe me pasaportën evropiane, nuk kërkon gjë tjetër veçse të mbulosh plaçkitjen që u ke bërë shqiptarëve.
Ai foli sot për paratë që do marrë nga BE, por nuk tha se ku janë paratë që ai ka marrë nga ju, që i ka vjedhur nga ju.
Ku shkuan? 
Ku janë 140 milionë euro të inceneratorit të Tiranës që nuk u ndërtua kurrë?
Ku janë 110 milionë euro që i fale Beketit me arrogancën tënde?
Ku janë 100 milioë euro që ke shpërdoruar tek Air Albania?
Ku janë 60 milionë euro të tunelit të Llogarasë?
Ku janë 68 milionë euro, anijet fantazmë, Tigrat e Ballukut?
Ku janë qindra milionë euro që paguan ti për rrugët e florinjta?
Duke luajtur me aspiratën evropiane të shqiptarëve, ti Edi Rama kërkon të mbulosh vjedhjet me pasaportën kallp evropiane në duart e tua.
A jetohet ndershëm në Shqipërinë e qeverisur nga Edi Rama, është pyetja që çdo qytetar duhet të shtrojë sot për fëmijët e tij?
A mund të ketë siguri për të ardhmen e fëmijëve në këtë vend me Edi Ramën?
A ka mundësi për të punuar dhe jetuar me dinjitet për mjekun, arkitektin, inxhinierin në Shqipëri?
Përgjigja është jo dhe vetëm jo.
Në Shqipërinë e Edi Ramës, Taulant Ballës, Belinda Ballukut, nuk ka vend për njerëzit e ndershëm.
Në Shqipërinë e Edi Ramës dhe Erion Veliajt nuk ka vend për të rinjtë.
Edi Rama nuk ka qeverisur për të mirën e njerëzve të thjeshtë.
Pas 12 vitesh, edhe 4 vite të Edi Ramës vetëm do përforcojnë të keqen e madhe.
4 vjet të tjera të Edi Ramës do kenë vetëm një rezultat, kapjen totale të shtetit nga Edi Rama, organizata e tij kriminale, oligarkët e tij, kurse shqiptarët do ikin nga Shqipëria. 
Ndaj dhe sot tingëllojnë më aktuale se kurrë vargjet e poetit Ali Asllani, koha është e maskarenjve, por atdheu është i shqiptarëve.
Atdheu është dashuri madhështore.
Është dashuria më sublime.
Dhe ne do punojmë që atdheu ynë, Shqipëria të bëhet madhështore." - tha mes të tjerave Berisha, i cili kritikoi qeverinë për mungesën e mundësive për qytetarët e ndershëm, rinjtë dhe profesionistët, duke thënë se Shqipëria është bërë vend i pamundur për ata që kërkojnë një të ardhme të sigurt. 

Në prezantimin e programit të PD-së dhe Aleancës për Shqipërinë Madhështore, kreu i Partisë Demokratike, Sali Berisha prezantoi projektin e ri për Shqipërinë, të cilin e cilësoi si një mundësi të madhe për vendin pas 34 vitesh.

Berisha kritikoi kundërshtarët politikë dhe e quajti programin e PS-së një kopje të dobët të planit të PD-së, duke e krahasuar me dështimin e Nokia-s në përpjekjen për të kopjuar iPhone. Ai theksoi se PS ka dështuar në krijimin e një projekti të vetin, duke iu dedikuar vetëm vjedhjes. Berisha shprehu besimin se fitorja e 11 majit do të sjellë një festë të shpresës, optimizmit dhe dinjitetit për Shqipërinë.

"Sot ne jemi mbledhur këtu për të prezantuar një projekt që në 34 vite, Shqipëria nuk e ka pasur kurrë ndonjëherë.
Një projekt aq i mirë, sa edhe PS, e cila qeverisi 12 vite me mashtrime me vjedhje, u kthye ta vlerësojë, të vjedhë dhe ta kopjojë.
Ndonëse kundërshtarët politikë, Edi Rama e pranoi se nuk ka projekt, apo më mirë të themi, projekti i tij është vetëm dora për të vjedhur.
Por miqtë e mi, kopja mbetet kopje e shëmtuar.
Asnjë nuk gënjehet.
E mbani mend, Nokia tre dekada më parë ishte në zenitin e teknologjisë, por Apple nxori iPhonen e parë, shumë herë më lart se Nokia. Nokia tentoi të kopjojë iPhonen, dështoi.
Apple nuk ia përmendi kurrë kopjen Nokias, por vazhdoi të përmirësojë iPhonen e saj.
Sepse kopja mbetet kopje, nuk rritet, nuk shitet, nuk pranohet." - tha mes të tjerave Berisha para demokratëve që kishin mbushur Pallatin e Kongreseve. 

Konsulenti amerikan i fushatës së Partisë Demokratike, Chris LaCivita, ka marrë pjesë në prezantimin e programit elektoral të PD në Pallatin e Kongreseve, gjatë Kuvendit Kombëtar të PD.

Në fjalën e tij, LaCivita ka theksuar dështimin e 12 viteve të qeverisjes nga Partia Socialiste dhe Edi Rama, duke e cilësuar këtë periudhë si një dështim të vërtetë për Shqipërinë, për lidershipin e qëndrueshëm dhe për familjen shqiptare.

LaCivita ka deklaruar se ky ka qenë një dështim për shumë arsye, por ka shtuar se Sali Berisha është një figurë që ka një lidhje të fortë me popullin shqiptar dhe është një mik i familjes shqiptare.

Ai ka theksuar se Berisha ka një plan të vërtetë për të ulur kostot e jetesës dhe një plan konservator që është i ngjashëm me politikat e presidentëve Ronald Reagan dhe Donald Trump. LaCivita ka përmendur se Berisha ka një plan për uljen e taksave dhe një plan për rininë shqiptare, duke krijuar mundësi pune dhe mundësi për një të ardhme më të mirë.

Në vazhdim, LaCivita ka shpallur se qëllimi i kësaj fushate është të ofrohet një lidership i qëndrueshëm nga Berisha, i cili është kundër një socialisti që sipas tij, “fshihet nga hija e vet”. Ai ka përfunduar duke theksuar se fitorja e Berishës është një fitore për familjen shqiptare, duke nënvizuar se vetëm me një lider të fortë dhe të besueshëm mund të arrihet një të ardhme më e mirë për Shqipërinë dhe qytetarët e saj.

Berisha ka një program të mirëfilltë konservator si Regan dhe Trump! Një fitore për të është fitore për çdo familje shqiptare

Miratimi i minimumit jetik prej 200 eurosh, paga minimale 500 euro, paga mesatare 1200 euro, çmimi i energjisë 7 lekë/Kw/h. Këto ishin vetëm disa prej pikave kryesore të programit të Partisë Demokratike i prezantuar pasditen e së shtunës në Kuvendi Kombëtar të Partisë Demokratike.    

Në nisje të prezantimit të programit elektoral për zgjedhjet e 11 majit, drejtuesi politik për Tiranën në Partinë Demokratike, Belind Këlliçi akuzoi qeverinë për një seri mashtrimesh ndaj shqiptarëve gjatë 12 viteve të fundit.

Duke falënderuar qytetarët e Tiranës, Këlliçi falënderoi qytetarët e Tiranës për pjesëmarrjen e tyre në hapjen e fushatës elektorale, duke theksuar se ata refuzuan tallavanë dhe politikat e dështuara të qeverisë.

Sipas tij, Rama ka ofruar një shërbim të dështuar për qytetarët në çdo sektor, duke përfshirë sigurimin e rendit dhe shëndetësinë.

Këlliçi denoncoi gjithashtu zhvatjen e pasurive të Shqipërisë dhe dështimin e premtimeve për legalizimet dhe investimet, duke i shpallur ato si manipulime të pasuksesshme që kanë dëmnuar qytetarët dhe ekonominë.

PROGRAMI 

PD-ja parashikon në program se ndërhyrja e parë, emergjente dhe e drejtpërdrejtë është Paketa e Emergjencës. "Nuk mund të flasim për rritje ekonomike dhe turizëm ndërkohë që pensionistët, familjet e reja, të rinjtë jetojnë në kufirin e varfërisë dhe pabarazia sociale është e skajshme."

Masa e parë është miratimi i minimumit jetik prej 200 eurosh, i cili garanton se çdo pension pleqërie, invaliditeti apo ndihmë ekonomike respekton dinjitetin njerëzor.

Paga minimale 500 euro, siguron çdo të ri apo punëtor në punët më të vështira se mund dhe duhet të ketë një shpërblim të denjë për djersën e vet.

Paga mesatare 1200 euro, i jep profesionistit në sektorin publik apo atë privat statusin që meriton dhe shanset reale për të mundësuar banim dhe mirëqenie për familjen e tij.

Çmimi i energjisë 7 lekë/Kë/h u mundëson qytetarëve të vendit me burime të mëdha hidrike që të paguajnë një çmim të drejtë, përkundër zhvatjes qeveritare të deritanishme.

Partia Demokratike angazhohet të rimëkëmbë sistemin shëndetësor:

Dyfishimi i buxhetit për shëndetësinë, sepse asnjë sistem shëndetësor serioz nuk mund të ngrihet mbi keqfinancim dhe mungesë të bazës materiale elementare.

Krijimi i një modeli të ri sigurimesh shëndetësore, që ofron më shumë mundësi dhe konkurrencë për pacientët.

Zgjerimi i listës së barnave të rimbursuara dhe garantimi i cilësisë së tyre, duke i dhënë fund ferrit të ilaçeve skadente dhe çmimeve të papërballueshme nga shtresat më të brishta ekonomikisht.

Programi për rininë, synon t’i japë fund dramës familjare dhe shoqërore të shpopullimit. Çdo prind meriton t’i ketë afër bijtë dhe bijat e veta. Çdo i ri meriton të ndërtojë të ardhmen në atdheun e vet, aty ku ka kujtimet, lidhjen emocionale dhe origjinën e pashkëputur kulturore.

Dyfishim i buxhetit për arsimin. Çdo teori zhvillimi apo ngritje sociale e vendos theksin te arsimi si faktor kyç. E nuk mund të ketë arsim modern pa një model serioz të financimit në nivelin e pagave, në shpërblim të kërkimit shkencor dhe në investime në pajisje dhe infrastrukturë arsimore.

Zërimi i taksave për 3 vite për bizneset e të rinjve. Të rinjtë shqiptarë e kanë dëshmuar në të gjithë botën se kanë shkëlqyer në rezultate studimi, pune dhe sipërmarrje. Është koha që këtë energji ta shfrytëzojmë në shtëpinë tonë.

1 çati për çdo çift. Saga e familjeve të reja për strehim duhet të marrë fund. Shteti duhet të marrë përgjegjësinë të financojë 20% të kredive dhe 30 mijë euro kredi pa interes për çdo çift.