Teksa lexonte disa prej komenteve kritikuese ndaj qeverisë, Rama hasi edhe në një koment ku një tifoz i Juventusit, skuadrës që mbështet edhe kryeministri, bënte thirrje që të votohet Partia Demokratike.

“Voto nr.1 të ikë ky psiqiku”- shkroi komentuesi me emrin në FB “Juventus Juve”.

Ky koment zhgënjeu kreun e qeverisë i cili shprehu edhe habinë sesi një tifoz i juventusit mund të jetë me PD-në ose “kënetën” siç e cilëson Rama.

“Po dhe ti mor brut? Dhe ti mor bianconero? Bianconero me kënetën, na turpërove fare. Nuk e di domethënë, po edhe ti me kënetën? Si mund të jetë një juventin me kënetën?!”- iu përgjigj kryeministri.

Sa i takon videove të montuara të cilat i publikon në rrjetin social duke identifikuar Berishën me figurën e bufit të kënetës, Rama tha se pavarësisht kritikave që merr nga njerëzit, do vijojë t’i publikojë të njëjtat video.

“E shoh se një pjesë e juaja preken shumë me 30 sekonda apo 2 minuta në ditë që shikoni bufin e kënetës. Po atë bufin do e shikoni çdo ditë, prekuni nuk kam çfarë ju bëj. Nuk doni ta pranoni se është një buf kënete. Nuk doni ta pranoni se jeni në kënetë prandaj reagoni kështu”- tha Rama. Versus.al

Pyetjes për shpopullimin e vendit, kryeministri Edi Rama nuk i ka shpëtuar as kësaj here nga një prej emigrantëve në rrjetet sociale. Gjatë komunikimit “direkt” të Ramës, emigranti shqiptar i shkruan se PS kërkon votën e diasporës, ndërkohë që shqiptarët janë larguar për shkak të keqqeverisjes.

Pavarësisht shifrave drastike që tregojnë shpopullim të vendit dhe plakje të popullsisë, Rama iu përgjigj duke thënë se një gjë e tillë nuk është e vërtetë dhe se ikja masive nuk kishte nisur kur ai erdhi në qeveri, por më herët.

Pjesë nga biseda në rrjetet sociale: 

Komentuesi: Po ne emigrantët jemi në Europë, harrove se e ke shpopulluar Shqipërinë prej se erdhe ne pushtet?

Rama: Kjo idiotësi është si puna e asaj shprehjes, shpif e shpif se diçka do mbetet dhe ju kanë mbetur në gojë kjo të gjithë atyre që ua ka stampuar bufi i kënetës me gjithë kukumjaçkat dhe kuakuakuatë e kënetës që po shpopullohet Shqipëria. Dhe flasin sikur lëvizja e shqiptarëve dhe largimi i tyre drejt Europës filloi kur erdha unë në qeveri ndërkohë që po të shikosh trajektoren e lëvizjes së shqiptarëve është e qartë sesi është zhvilluar, kur ka pasur rritje apo ulje. Nuk e kuptoj fare, në 97-ën, 98-ën, 2012-ën, unë isha në detyrë kur ka pasur ikje shumë më masive? E dyta, ju emigrantët jeni në Evropë, por jo të gjithë shqiptarët e Europës kanë mundësinë e qytetarisë europiane. Versus.al

Kryeministri Edi Rama ka mbajtur sot një komunikim “direkt” me ndjekësit në rrjetet sociale duke iu përgjigjur pyetjeve të tyre të ndryshme.

Teksa sqaroi foton e postuar me një familje emigrantësh jashtë vendit që kishte votuar dhe do të dorëzonte zarfin, kreu i qeverisë tha se u kishte marrë leje. Ndërsa dha udhëzime për mënyrën e votimit, Rama tha se çdo votë që nuk jepet për PS në fletën e votimit është ‘e hedhur kot’.

“Vendoset një shënim kryq ose vizë ose rreth brenda kuadratit ku shkruhet numri 5. Në çdo kuti tjetër vota juaj është juridikisht e vlefshme por politikisht e pavlefshme sepse është e hedhur në kotësinë e përgjithshme jashtë territorit të shumicës. Në këtë moment duhet një shumicë përtej shumicës së PS për të realizuar me sukses negociatat me BE dhe kjo është gjëja më e rëndësishme.

Pastaj një preferencë të vetën sipas qarqeve. Dikush tjetër komenton se çfarë vendi jemi ne ku akoma transportohet vota me postë të huaj. Të jemi të qartë, këtë lloj poste e përdor çdo vend i huaj. Disa flasin sikur nuk kanë parë botë me sy ndërkohë që shkruajnë nga jashtë”- u shpreh kryeministri në rrjetet sociale. Versus.al