Gjykata Kushtetuese ka publikuar edhe arsyetimin e saj mbi pezullimin e dekretit të presidentit Bajram Begaj sa u takon zgjedhjeve për bashkinë e Tiranës, të planifikuara për t’u mbajtur më 9 nëntor.

Duke iu referuar kërkesës së dorëzuar nga kryebashkiaku i shkarkuar Erion Veliaj kundër vendimit të marrë me shumicë votash në këshillin bashkiak, gjykata thekson se Veliaj kishte dorëzuar edhe një kërkesë shtesë për shfuqizimin e dekretit të Begajt.

Në argumentimin e bërë, thuhet se nëse dekreti i Begajt për zgjedhjet në Tiranë do të zbatohej edhe pse çështja për  shkarkimin e Veliajt është ende në shqyrtim, atëherë do të sillte pasoja të pakthyeshme në dëm të këtij të fundit.

Arsyetimi i Kushtetueses:

2.Në  mbështetje  të   kërkesës  për  pezullim, kërkuesi ka pretenduar se, për sa kohë Kushtetuta i kadhënë Gjykatës kompetencën dhe përgjegjësinë për  të  garantuar  të  drejtën  e  organit  të  zgjedhur vendor ajo duhet të ndalojë pasojat e paligjshme që vijnë  nga  dekreti  i  Presidentit.  Sipas  tij,  zbatimi  i dekretit   përpara   se   të   shprehet   Gjykata   për ligjshmërinë  e  VKM-së  që  e  ka  shkarkuar  atë  nga detyra,  rrezikon  të  prodhojë  pasoja  të  rënda,  të parikthyeshme,    që    prekin    jo    vetëm    pozitën institucionale  të  të  zgjedhurit  vendor,  por  edhe interesat  shtetërore,  shoqërore  dhe  të  qytetarëve. Kërkuesi ka pretenduar se pasojat e mundshme janë organizimi  i  zgjedhjeve   në  një  bashki  ku  nuk ekziston  vakanca  juridike;  shpenzimet  e  burimeve njerëzore e financiare për organizimin e zgjedhjeve; një  proces  zgjedhor  i  imponuar  politikisht  dhe kundër vullnetit të qytetarëve. Po sipas tij, në rast se nuk vendoset pezullimi, vendimi i Gjykatës nuk do të rivendosë situatën e mëparshme dhe pasojat do të ishin të pakthyeshme, duke u krijuar një precedent i rrezikshëm,  zëvendësimi  i  të  zgjedhurit  vendor përpara se të vendoset vlefshmëria eshkarkimit.

3.Sipas nenit 45, pika 1, të ligjit nr. 8577/2000, të  ndryshuar,  Gjykata,  kryesisht  ose  me  kërkesë  të palëve, kur vlerëson se zbatimi i ligjit ose aktit mund të   sjellë   pasoja   që   prekin   interesa   shtetërore, shoqërore ose të individëve, sipas rastit, me vendim të  Mbledhjes  së  Gjyqtarëve  ose  në  seancë  plenare urdhëron  pezullimin  e  tij.  Sipas  kësaj  dispozite,  së pari: subjekti që kërkon pezullimin e një akti duhet të provojë prekjen e interesave shtetërore, shoqërore ose të individëve, si dhe pasojat e pariparueshme që do të sjellë zbatimi i aktit; së dyti: shqyrtimi i kërkesës mund  të  bëhet  nga  Gjykata  përpara  ose  në  seancë plenare.

4.Mbledhja e Gjyqtarëve, pasi mori në shqyrtim pretendimet  e  kërkuesit  në  mbështetje  të  kërkesës për  pezullim,  vlerësoi  se  në  rastin  konkret  ajo ndodhet në kushtet e parashikuara nga neni 45 i ligjit nr.   8577/2000.   Në   vlerësimin   e   Mbledhjes   së Gjyqtarëve  zbatimi  i  dekretit  të  Presidentit  për zhvillimin e zgjedhjeve vendore vetëm për Bashkinë e  Tiranës,  do  të  sillte  pasoja  të  pariparueshme  në drejtim   të   të   drejtave   të   të   zgjedhurit   vendor (kërkuesit),   për   sa   kohë   çështja   gjyqësore   për shkarkimin e tij është ende në shqyrtim.

PËR KËTO ARSYE, Mbledhja e Gjyqtarëve të Gjykatës Kushtetuese të Republikës së Shqipërisë, në mbështetje të nenit 45,  pika 1,  të  ligjit  nr.  8577,  datë  10.2.2000 “Për organizimin dhe  funksionimin e Gjykatës Kushtetuese  të  Republikës  së  Shqipërisë”,  të ndryshuar   dhe   nenit   27,   të   Rregullores   për Procedurat Gjyqësore të Gjykatës, njëzëri,VENDOSI:

1.Pezullimin   e   dekretit   të   Presidentit   të Republikës  së  Shqipërisë  nr.  350,  datë 1.10.2025 “Për caktimin e datës së zgjedhjeve të pjesshme vendore   për  kryetar  bashkie,   për  disa   njësi   të qeverisjes vendore” për pjesën që cakton  datën  e zgjedhjeve vendore në Bashkinë Tiranë.

Ndërkohë, data për zgjedhjet e parakohshme në 5 bashkitë e tjera, vijon të mbetet 9 nëntori. Versus.al

Presidenca ka vendosur të respektojë vendimin e Gjykatës Kushtetuese për pezullimin e zgjedhjeve të parakohshme për bashkinë e Tiranës të cilat sipas dekretit të Begajt ishin planifikuar të mbaheshin më 9 nëntor të këtij viti njëjtë si në 5 bashkitë e tjera.

“Në përgjigje të interesit të mediave, ju bëjmë me dije se Institucioni i Presidentit të Republikës respekton vendimin e Gjykatës Kushtetuese për pezullimin e pjesës që përcakton datën e zgjedhjeve vendore në Bashkinë e Tiranës të dekretit me nr.350, datë 01.10.2025”- thuhet në reagimin e shkurtër të presidencës.

Kujtojmë se Begaj u kritikua për dekretimin e zgjedhjeve ndërkohë që Kushtetuesja kishte marrë në shqyrtim ankimin e Veliajt kundër shkarkimit të tij nga posti i kryebashkiakut. Në një studio televizive ai pretendoi se ishte këshilluar me këshilltarët e tij mbi këtë dekret dhe se ishte i bindur që ishte gjëja e duhur për t’u bërë. Versus.al

Pas vendimit të Gjykatës Kushtetuese që pezulloi zgjedhjet e 9 nëntorit për bashkinë e Tiranës, ka ardhur edhe reagimi i Partisë Socialiste. Mësohet se PS ka këshilluar strukturat e ngritura për zgjedhjet e pjesshme që të kenë në kujtesë takimet me grupet përkatëse duke lënë të kuptohet se nuk ka asnjë ndryshim në organizim pavarësisht se procesi aktualisht është pezulluar.

“Vazhdoni punen! Ju kujtoj për takimet e sipas grupeve përkatëse"- thuhet në mesazhin e PS.

Kujtojmë se socialistët do të kenë zëvendës kryeministren Belinda Ballukun si drejtuese politike për këto zgjedhje në Tiranë. Ndërsa ende nuk dihet sesi do të procedohet për shkak se Kushtetuesja njoftoi sot se procesi zgjedhor është zyrtarisht i pezulluar dhe se më 30 tetor do të shqyrtojë kërkesën e Veliajt kundër shkarkimit të tij nga posti i kryebashkiakut. Versus.al

Florjan Binaj

Pas vendimit të Gjykatës Kushtetuese për pezullimin e zgjedhjeve të në Tiranë, Flori ka bërë një apel për qytetarët dhe mbështetësit e tij.

Në një postim në rrjetet sociale, ai thekson se zgjedhjet janë vetëm hapi i parë në rrugën për ndryshim dhe se, sapo të caktohet data e votimit, ai dhe ekipi i tij do të marrin pjesë me vizion dhe vullnet për ndryshim.

Ai fton qytetarët të punojnë çdo ditë për të ndërtuar besimin tek politika e ndershme, tek puna për qytetarët dhe tek ideja se pushteti duhet të shërbejë vetëm ata që e japin atë qytetarët.

Flori përfundon mesazhin me një mesazh motivues:

“Partia më e rëndësishme, partia më e fuqishme në botë është partia e qytetarëve.”

Ky postim i aktorit vjen pasi Gjykata Kushtetuese vendosi pezullimin e dekretit të presidentit Bajram Begaj përsa i takon zgjedhjeve të parakohshme të parashikuara për t'u mbajtur më 9 nëntor në bashkinë e Tiranës.

Postimi i plotë i Florjan Binajt:

Miqtë e mi,
Zgjedhjet e pritshme në Tiranë janë vetëm hapi i parë në rrugën e gjatë që po nisim.
Kurdo që të caktohet votimi, ne do të marrim pjesë me vizionin dhe vullnetin tonë për ndryshim.
Deri atëhere ju ftoj të punojmë çdo ditë për të ndezur në mendjet dhe zemrat e qytetarëve besimin tek politika e ndershme, tek politika e punës, besimin se pushteti buron nga qytetarët dhe duhet të punojë vetëm për qytetarët.
Partia më e rëndësishme, partia më e fuqishme në botë është partia e qytetarëve.
Flori./Versus.al

Fotomontazh: Erion Veliaj, Bajram Begaj (në sfond dekreti i presidentit për zgjedhjet)

Gjykata Kushtetuese ka vendosur pezullimin e dekretit të presidentit Bajram Begaj përsa i takon zgjedhjeve të parakohshme të parashikuara për t'u mbajtur më 9 nëntor në bashkinë e Tiranës.

Kushtetuesja u vu në lëvizje pas padisë së dytë të bërë nga kryebashkiaku i shkarkuar Erion Veliaj kundër dekretit të Begajt të cilin e konsideroi antikushtetues. Veliaj kërkonte që zgjedhjet në bashkinë e Tiranës të pezulloheshin deri në shqyrtimin e kërkesës së bërë më herët ndaj tij sa i takon shkarkimit nga qeveria.

Ndërkohë, gjykata do ta shqyrtojë kërkesën e Veliajt më datë 31 tetor. Masa e pezullimit të zgjedhjeve do të jetë e vlefshme vetëm për bashkinë e Tiranës, ndërsa për zgjedhjet e parakohshme në bashkitë e tjera, mbetet në fuqi data 9 nëntor. 

Shkarkimi i Veliajt nga qeveria, u bë pasi këshilltarët bashkiakë të PS dhe PD votuan me unanimitet për ta hequr nga posti i kryebashkiakut me motivacionin se nuk ishte paraqitur në detyrë duke kryer kështu shkelje të rëndë. Dy ditë pas shkarkimit, Veliaj dorëzoi në Kushtetuese ankimin duke pretenduar se ai ka qenë në kushte arresti dhe kësisoj nuk ka patur sesi të paraqitej në detyrë.

Pavarësisht se marrja në shyqrtim e ankimit nga Gjykata Kushtetuese si rregull sjell pezullimin e procesit zgjedhor për Tiranën, Begaj vijoi dhe nxorri dekret për datën 9 nëntor duke u shprehur se Veliaj duhej ta kishte bërë ankimin në gjykatën administrative. Pas dekretit të Begajt, Veliaj dorëzoi sërish ankim dhe sot Kushtetuesja vendosi në favor të tij duke pezulluar zgjedhjet për Tiranën. Versus.al