Për herë të parë pas më shumë se 40 vitesh, Japonia ka një princ që arrin moshën madhore, por ky moment historik shoqërohet edhe me shqetësime të mëdha për të ardhmen e familjes perandorake më të vjetër në botë.
Princi Hisahito, i lindur më 6 shtator 2006, është djali i vetëm i Princit të Kurorës Akishino dhe Princeshës Kiko, dhe i dyti në radhë për fronin perandorak, pas babait të tij. Ai u njoh zyrtarisht si madhor gjatë një ceremonie të mbajtur në pallat, në përputhje me traditat e lashta të oborrit japonez.
Por ky moment nuk është vetëm një festë. Për shumë japonezë, ai është edhe një kujtesë shqetësuese: pas Hisahitos, nuk ka më asnjë trashëgimtar mashkull në familjen perandorake. Mungesa e pasardhësve burra dhe rregullorja që lejon vetëm meshkujt të trashëgojnë fronin ka hapur një debat të gjatë mbi reformimin e ligjit të suksesionit, i cili ndalon gratë të bëhen perandore.
Një student që dashuron insektet
Aktualisht, princi është student i vitit të parë në Universitetin Tsukuba, pranë Tokios, ku studion biologji. Pasioni i tij? Insektet. Ai madje ka bashkëautoruar një studim shkencor mbi biodiversitetin e insekteve në kopështin e rezidencës së tij në Akasaka.
Në konferencën e tij të parë për shtyp në mars, Hisahito deklaroi se dëshiron të fokusohet në mbrojtjen e popullatave të insekteve në zonat urbane, një fushë ku ai tashmë ka nisur të lërë gjurmë.
Një trashëgimi që rëndon mbi supet e një të riu
Hisahito ka dy motra më të mëdha: Princesha Kako, shumë e dashur nga publiku, dhe Mako, e cila hoqi dorë nga titulli i saj për t’u martuar me një qytetar të thjeshtë – një zgjedhje që theksoi edhe më shumë kufizimet e sistemit aktual.
Ndërkohë që Japonia përballet me një rënie të popullsisë dhe një sistem perandorak që varet vetëm nga pasardhësit meshkuj, shumë ekspertë dhe qytetarë kërkojnë rishikimin e ligjit të trashëgimisë së fronit, i cili daton nga shekulli XIX. Pa një ndryshim të këtij ligji, ardhmëria e perandorisë japoneze mbetet më shumë se kurrë në pikëpyetje – edhe pse Hisahito sapo ka nisur rrugëtimin e tij si burrë./ Versus /
