Një film i ri mbi jetën e jashtëzakonshme, por të trazuar të Michael Jackson pritet të dalë në kinema dhe tashmë po parashikohet si një nga hitet më të mëdha të vitit. Megjithatë, lind pyetja nëse ai do të tregojë historinë e plotë të ikonës së pop-it.
Filmi vjen nga producenti Graham King, i njohur për suksesin e madh të “Bohemian Rhapsody”, biopikun për Freddie Mercury dhe grupin Queen, i cili arkëtoi mbi 900 milionë dollarë dhe fitoi katër çmime Oscar. Pas këtij suksesi, King vendosi të sjellë në ekran jetën e Michael Jackson.
Produksioni i ri, me titull “Michael”, përballet që në fillim me një temë të ndjeshme: akuzat për abuzim ndaj fëmijëve që kanë shoqëruar figurën e Jackson. Ai u akuzua në vitin 1994 dhe më vonë u shpall i pafajshëm në një proces gjyqësor në vitin 2005. Megjithatë, çështjet ligjore dhe dyshimet publike mbeten ende pjesë e debatit rreth trashëgimisë së tij.
Përfaqësuesit e trashëgimisë së artistit këmbëngulin se ai është i pafajshëm, duke u mbështetur në vendimet e jurisë dhe provat e paraqitura në gjykatë. Nga ana tjetër, kritikët dhe dokumentarë si “Leaving Neverland” vazhdojnë të mbajnë gjallë polemikat.
Filmi, i shkruar nga John Logan dhe i drejtuar nga Antoine Fuqua, do të sjellë në ekran aktorë të njohur, ndërsa rolin kryesor e interpreton Jaafar Jackson, nipi i këngëtarit. Producentët pretendojnë se projekti do të trajtojë “jetën komplekse” të artistit, megjithatë versionet e fundit të skenarit duket se janë ndryshuar gjatë rrugës.
Sipas raportimeve, filmi fillimisht parashikonte të përfshinte më thellë akuzat dhe pasojat e tyre në jetën e Jackson, por versioni aktual fokusohet kryesisht në ngritjen e tij drejt famës dhe përfundon me koncertin e turneut “Bad” në vitin 1988, pa u ndalur në aspektet më të debatueshme të historisë së tij.
Ndërkohë, suksesi i Michael Jackson si artist mbetet i jashtëzakonshëm edhe sot, me dhjetëra miliona dëgjues në platforma streaming dhe projekte të shumta skenike që mbajnë gjallë emrin e tij në industrinë e argëtimit.
Filmi pritet të sjellë jo vetëm interes të madh nga publiku, por edhe një debat të ri mbi mënyrën se si Hollywood trajton figurat e diskutueshme të historisë së muzikës.
