"Sapo kishte filluar pjesa e parë e ndeshjes. Papritur u gjenda përballë këtyre individëve me kapuç. Mendova se ishin vetëm dy prej tyre, ndaj u përballa me ta".
Kështu thotë Roberto Baggio, i cili mbante një shirit të madh në kokë për të mbuluar qepjet, pas grabitjes brutale që pësoi në shtëpi bashkë me familjen .
Ish-kampioni italian shton: “Unë u përpoqa t'i godisja për të mbrojtur gruan dhe fëmijët, por më pas erdhën edhe të tjerët: në fillim dy, pastaj një i pesti. Për më tepër, pashë që ishte një person tjetër jashtë, më imobilizuan dhe unë përfundova në tokë, nuk mund ta harroj atë ndjenjën e pafuqisë.
“Në rrethana të ngjashme çdo gjë mund të ndodhë, dhe për fat të mirë dhuna e pësuar solli vetëm disa qepje, mavijosje dhe shumë frikë”, vijon kampioni për median italiane La Repubblica.
“Sulmi ishte i shpejtë rrufe, tani do të forcojmë më tej sistemet e zbulimit në të gjithë perimetrin”.
Në Altavilla Vicentina mbërriti edhe Diego Fabbi, vëllai i gruas së Baggio-s, Andreina.
“Ne folëm gjerësisht, por motra ime nuk donte ta kujtonte të gjithë dinamikën, sepse ajo është ende shumë e tronditur”, tha ai në fund të vizitës. "Ata ishin të gjithë duke parë ndeshjen së bashku dhe për fat të keq ishte edhe nëna ime. Ata nuk mund ta kuptonin se nga hynë. Ajo që është e sigurt është se e goditën shumë rëndë."
