Tekniku i Realit të Madridit, Carlo Ancelotti ka një motiv më shumë për të buzëqeshur në këtë prag sezoni, pasi ylli francez Kylian Mbappe ka përfunduar pushimet dhe ka nisur stërvitjen me ekipin.
Imazhet që të gjithë fansat e “Los Blancos” prisnin janë publikuar nga klubi mbretëror dhe Mbappe shihet i veshur me fanellat e stërvitjeve, duke iu bashkuar ekipit në seancën e parë stërvitore në Valdebebas.
Bashkë më Mbappe në kampin madrilen janë rikthyer Aurelien Tchouameni, Edouardo Camavinga, Ferlan Mendy, Fede Valverde, Jude Bellingham, Dani Carvajal dhe David Alaba.
Tifozë të shumtë të Real Madrid ishin mbledhur që herët për të ndjekur seancën e parë stërvitore në shtëpi pas turit amerikan të “Los Blancos”, por edhe për të marrë autografe nga sulmuesi francez.
Mbappe pritet që për herë të parë me fanellën e Realit të zbresë në fushë për sfidën me Atalantën, për Superkupën e Evropës që do të luhet më 14 gusht në Varshavë.
Ai së bashku me Bellingham dhe 6 të tjerët e rikthyer rishtazi në stërvitje do të ndjekin një program të hartuar nga përgatitësi fizik Antonio Pintus për 15 ditë, në mënyrë që të fitojnë formën ideale.
