Figura të artit politikës dhe qytetarë të përlotur dhe me duar në lule i dhanë lamtumirën e fundit Zonjës së Madhe, Margarita Xhepa.
Pas mbylljes së homazheve që nisën që prej orës 10:00 dhe u mbyllën në orën 13:00 në hollin e Teatrit Kombëtar të Operës dhe Baletit, ikona e kinematografisë shqiptare u përcoll për në banesën e fundit, varrezat e Sharrës.
Aktori i njohur Timo Flloko tha se pavarësisht se Margarita nuk jeton më ajo do të jetë e paharruar.
“Është simboli i artistes në gjithësi. Do të mbetet e paharruar te artdashësit. Po ta shikoni në këto homazhe ka një trysni të njerëzve që vijnë e duan ta nderojnë. Kam një kujtim të rrallë, kam bërë një skenë të Hamletit me të. E kam edhe të regjistruar”, tha Timo Flloko.
Zonja e Madhe kinematografisë shqiptare ndërroi jetë ditën e djeshme (3 prill) një ditë pasi festoi 91 vjetorin.
Aktorja u lind më 2 prill të vitit 1934, në qytetin e Lushnjës, prej ku nisi edhe hapat e parë drejt karrierës së saj.
Gjatë karrierës së saj, aktorja numëron mbi 150 role në teatër dhe 30 në kinematografi.
Veç suksesit me veprat e shumta të dramaturgëve shqiptarë, Margarita Xhepa ka korrur sukses edhe në rolet e dramaturgjisë botërore si, Ofelia tek “Hamleti”, vajza e dytë tek “Mbreti Lir”, dadoja tek “Romeo e Zhuljeta”, mbretëresha Margaret tek “Rikardi III”, etj.
