Argjentina ka siguruar me shumë vuajtje një biletë për në çerekfinalet e Kupës së Botës 2026, pasi përmbysi Egjiptin me rezultatin 3-2 në një nga ndeshjet më dramatike të turneut.
Kampionët në fuqi u gjendën në një situatë tepër të vështirë, pasi Egjipti arriti të krijonte epërsi me dy gola, duke qenë shumë pranë një prej surprizave më të mëdha të këtij Botërori.
Megjithatë, "Albiceleste" reagoi në momentin më të vështirë dhe realizoi një përmbysje spektakolare në vetëm 13 minutat e fundit të takimit, duke shënuar tre herë dhe përmbysur fatin e ndeshjes për të siguruar kualifikimin mes tetë skuadrave më të mira të Kupës së Botës.
Një nga protagonistët e mbrëmjes ishte Lionel Messi. Kapiteni argjentinas, i cili në pjesën e parë humbi një penallti që mund të kishte ndryshuar rrjedhën e sfidës, arriti të shënojë një nga golat e përmbysjes dhe të udhëheqë skuadrën drejt fitores.
Pas vërshëllimës së fundit të arbitrit, emocionet pushtuan yllin argjentinas. Messi nuk arriti t'i mbante lotët, duke treguar peshën e madhe emocionale që kishte kjo ndeshje për të dhe për kombëtaren argjentinase.
Me golin e shënuar ndaj Egjiptit, Messi ka arritur në kuotën e 21 golave në historinë e Kupës së Botës, tetë prej të cilëve i ka realizuar në edicionin 2026, duke u konfirmuar si golashënuesi më i mirë në historinë e turneut.
Falë këtij suksesi dramatik, Argjentina vazhdon rrugëtimin në Kupën e Botës 2026 dhe tashmë do të synojë të mbrojë titullin e fituar katër vite më parë, ndërsa në çerekfinale e pret një tjetër sfidë e rëndësishme drejt ëndrrës për një tjetër trofe botëror./Versus.al
View this post on Instagram
