Kylian Mbappe ka folur për herë të parë pas humbjes së ndeshjes gjysmëfinale të EURO2024 me Spanjën.
Sulmuesi është shprehur para gazetarëve se skuadra e tij "nuk bëri mjaftueshëm për të arritur në finale."
''Ata (Spanja) luajtën më mirë se ne, e meritojnë të shkojnë në finale ndërsa ne po kthehemi në shtëpi”.
"Kisha ambicie të bëhesha kampion i Evropës. Kisha synim të bëja një Euro të mirë. Nuk bëra asnjërën. Është një zhgënjim" shtoi më tej Mbappe.
Por nuk ishte vetëm Mbappe ai që dështoi, e gjithë skuadra franceze luftoi gjatë gjithë turneut.
Djemtë e Didier Deschamps shënuan vetëm dy gola që nuk ishin autogola, njëri prej të cilëve ishte penalltia e Mbappes kundër Polonisë në fazën e grupeve.
Hunda e thyer e lojtarit, e cila kërkonte që ai të mbante një maskë mbrojtëse kufizuese, i ndërlikoi më tej gjërat.
“Tani do të shkoj me pushime, do të pushoj mirë. Do të më bëjë shumë mirë, pastaj do të përgatitem për të filluar një jetë të re. Ka shumë për të bërë”, përfundoi francezi.
Në vetëm një javë, 25-vjeçari do të prezantohet zyrtarisht si lojtari i ri i Real Madridit. Atij do t’i duhet kjo kohë për t’u përgatitur për atë që premton të jetë një fazë e re në karrierën e tij./ Versus
