Mes emocioneve të forta, duartrokitjeve të publikut dhe dritave vezulluese, bukuroshet shqiptare parakaluan mbrëmjen e së mërkurës në skenën magjike të Amfiteatrit të Liqenit Artificial, ku u zhvillua spektakli madhështor “Miss Shqipëria 2025”.
Vajzat, njëra më e bukur se tjetra, erdhën nga të gjitha trevat shqiptare me një synim të përbashkët – kurorën e më të bukurës shqiptare.
Në një mbrëmje ku arti dhe emocionet u ndërthurën në mënyrë harmonike, publiku shijoi një garë plot elegancë, stil dhe personalitet.
Kurora e shumëpritur u fitua nga Valentina Gegprifti, përfaqësuese nga Pogradeci, e cila spikati jo vetëm për bukurinë e saj natyrore, por edhe për inteligjencën dhe prezencën në skenë.
Fituesja e vitit të kaluar, Klea Llagonia, ishte ajo që i dorëzoi stafetën dhe kurorën, duke i uruar Valentinës një rrugëtim të suksesshëm në këtë kapitull të ri të jetës së saj – një udhëtim që sapo ka nisur për bukuroshen pogradecare.
Gara ishte e fortë dhe plot emocione, dhe bashkë me Valentinen, u vlerësuan edhe dy vajza të tjera që shkëlqyen: Shoqëruese e Parë u zgjodh Klea Thaçi, ndërsa shoqëruesja e dytë, Laora Peka.
Ndërkohë, çmimet ndërkombëtare, që u japin mundësinë përfaqësueseve shqiptare të shkëlqejnë në skenat botërore të bukurisë, u fituan nga:
Miss International Albania 2025: Gledia Preka
Miss Earth Albania 2025: Kleja Sulejmani
Miss Supranational Albania 2026: Natalia Lalaj
Një çmim i veçantë për këtë edicion ishte edhe ai i Miss Elite, që iu dha Dea Hilës, për stilin, elegancën dhe klasin e saj të padiskutueshëm./Versus.al
