Lojtari i kombëtares shqiptare Arlind Ajeti ka kompletuar transferimin në Turqi tek ekipi i Bodrumsporit.
Bodrumspor që momentalisht zë vendin e 14-të në elitën e futbollit turk pas katër javësh, ka vazhduar me përforcime.
Pasi kohë më parë transferuan Taulant Seferin, ata tashmë kanë shtuar në radhët e tyre dhe mbrojtësin Arlind Ajeti.
“Klubi ynë ka nënshkruar një marrëveshje tri vjeçare me Arlind Ajetin, mbrojtësin që ka veshur fanellën e CFR Cluj sezonin e kaluar. Mirësevini në familjen tonë Arlind”, thuhej në njoftimin e Bodrumspor.
Ajeti ka zhvilluar në total 26 paraqitje me fanellën e Clujit në Rumani, aty ku kishte arritur të shënonte dy gola.
30-vjeçari ka qenë pjesë e Shqipërisë në Euro 2024, mirëpo nuk ka marrë ftesën nga përzgjedhësi Sylvinho për dy ndeshjet e shtatorit.
