Seanca e sotme e komisioni hetimor për koncesionet në Shëndetësi u përfshi nga debatet pasi anëtarët e opozitës kërkuan që deputetja Milva Ekonomi të mos jetë e pranishme në seancën ku do pyeten audituesit e KLSH duke e cilësuar rastin e saj si “konflikt interesi” për shkak se ka mbajtur postin e zv.ministres së Shëndetësisë asokohe.
Ndërsa Ekonomi sqaroi se nuk është në konflikt interesi duke theksuar se nuk kishte firmosur kontratat e financimit dhe se nuk kishte marrë pjesë në përzgjedhjen e kompanisë fituese.
Për këtë çështje pati edhe përplasje mes deputetëve Vokshi e Ndreca.
Pjesë nga debati:
Vokshi: Mos bërtisni dhe flisni me edukatë këtu se ju ndjerr jashtë, mos guxo të ma ngresh zërin këtu. Ti dhe asnjë prej juve këtu të mos guxojë të ngrejë zërin. E kuptoj se jeni në siklet, i bëj ftesë Konomi ti bëjë thirrje ndërgjegjies së saj që st të mos jetë pjesë e këtij komisioni pasi mendohet se keni konflikt interesi.
Ndreca: Lëre guximin tonë, se nuk na e tregon dot ti. Ngritja e zërit është për shkak të uzurpimit që i bën mikrofonit. Fakti që ke një buton që mund t’u ndalosh fjalën të tjerëve nuk do thotë se duhet të abuzosh me këtë të drejtë. Ke gjysmë ore që merresh me një prej anëtarëve.
Vokshi: Mos u merr me mua
Ndreca: Se ku futem unë, nuk të marr leje ty. Lëreni anëtaren ta vlerësojë vetë pjesën morale. E shpjeguam dhe po e theksojmë sërish, nuk është në konflikt interesi. Asnjë prej jush nuk ka dorëzuar kërkesë në sekretari zyrtarisht. Nëse keni ardhur të dëgjojmë dëshmitë
Pas rrëzimit të kërkesës së deputetëve opozitarë, seanca ka vijuar me dëgjimin e dëshmisë së audituesve të KLSH lidhur me shkeljet e gjetura në koncesionin për "Sterilizimin". Versus.al
