Administrata Trump thuhet se i ka paraqitur Bashkimit Evropian një propozim që do të mbante një tarifë bazë prej 10% për të gjitha mallrat evropiane, me përjashtime në sektorë të ndjeshëm si avionët dhe alkooli, sipas një diplomati evropian dhe një zyrtari kombëtar që foli për Politico. Administrata Trump njoftoi të dielën se do të shtynte vendosjen e tarifave të gjera deri më 1 gusht, duke u dhënë vendeve kohë për të negociuar marrëveshje të reja tregtare me Shtetet e Bashkuara. Siç u bë e ditur, tarifat për vendet që nuk arrijnë një marrëveshje do të kthehen në nivelet e 2 prillit.
Njoftimet filluan të hënën me Korenë e Jugut dhe Japoninë , të cilat do të përballen me tarifa prej 25% nga 1 gushti.
Komisioneri Europian i Tregtisë Maros Sefcovic ka qenë në komunikim të hapur me administratën amerikane që nga një telefonatë midis Presidentit Trump dhe Presidentes së Komisionit Europian Ursula von der Leyen të dielën. Diplomatët thanë se Sefcovic i informoi ambasadorët e BE-së se Komisioni nuk pret të marrë asnjë nga letrat me tarifat e reja.
Megjithatë, korniza e marrëveshjes tregtare mbetet e paqartë dhe diplomatët theksojnë se çdo gjë për të cilën do të bihet dakord do të ketë nevojë për miratimin përfundimtar të Trump. Uashingtoni nuk ka dhënë asnjë tregues nëse synon të përjashtojë industritë politikisht të ndjeshme si makinat, çeliku, alumini ose farmaceutika - një kërkesë që BE ka ngritur. Në vend të kësaj, vende të tilla si Franca, Italia dhe Irlanda pritet të jenë të kënaqura me përjashtime të mundshme për avionët dhe alkoolin.
Zëdhënësja e Shtëpisë së Bardhë, Caroline Levitt, tha të hënën se një urdhër ekzekutiv do ta bënte zyrtar zgjatjen e pezullimit. Deri atëherë, BE kishte synuar një afat deri më 8 korrik (afati ishte 9 korriku) për të arritur një marrëveshje, me Komisionin që tha se do të punonte intensivisht drejt një marrëveshjeje deri të mërkurën.
Ministri irlandez i Tregtisë, Simon Harris, konfirmoi të hënën në mbrëmje se "tani mund të presim një zgjatje të regjimit aktual deri më 1 gusht, në mënyrë që të ketë më shumë kohë për të arritur një marrëveshje në parim midis BE-së dhe SHBA-së".
Në këtë kontekst, Brukseli thirret të balancojë midis pranimit të një asimetrie të mundshme në negociatat me Uashingtonin dhe rrezikut të përballet përsëri me përmbysje të paparashikuara nga administrata Trump. Në një takim të mbajtur të hënën në mbrëmje, atmosfera u përshkrua nga diplomatët si "e rëndë", pasi nuk kishte garanci nga SHBA-të për të shmangur ndryshime të reja surprizë në tarifa.
Komisioni Evropian nuk pranoi të komentojë më tej, duke u kufizuar në deklarimin se "negociatat po vazhdojnë".
