Komisioni i posaçëm për Dezinformimin përmbylli sot dëgjesat publike të disa prej institucioneve lidhur me sulmet kibernetike të huaja në vend dhe rrezikun e ndikimit keqdashës në fusha të ndryshme.
Kryetari i komisionit, deputeti socialist Erion Braçe, ngriti shqetësimin e mungesës së kuadrit ligjor për të neutralizuar kërcënime të tilla, ndërsa tha se tashmë ka ardhur koha që edhe institucionet e drejtësisë të raportojnë para këtij komisioni mbi ndjekjet penale për këto shqetësime.
“Përmbyllja e këtyre dëgjesave nuk do të thotë se mbarojmë këtu me seancat dëgjimore me institucionet. Ka ardhur momenti besoj që dhe institucionet e drejtësisë të jenë në seancë dëgjimore në komisionin e posaçëm për të marrë më shumë informacion mbi ndjekjet penale për këto sulme kibernetike.
Në përmbyllje të këtyre seancave dëgjimore jam më i bindur se kurrë se e para mbi të gjitha, jemi zbuluar. E përsëris këtë gjë se është një shqetësim shumë i madh. Sot edhe ministri edhe drejtori i policisë thanë se janë në boshllëk ligjor për të vepruar kundër këtyre sulmeve.
Edhe nga materiali që pashë sot nga përgjigjia e institucioneve të drejtësisë pashë të njëjtën gjë. E dyta ka krijuar problem të madh informaliteti i adresave të përdorur në rrjete sociale. Adresa individësh që veprojnë si ofrues të informacioneve pra si media. Shumë e vështirë është nga ana e insitucioneve të identifikojnë se kush qëndron pas këtyre portaleve. Kemi evidentuar portale në gjuhën shqipe pas të cilave qëndron Rusia dhe Kina”- u shpreh Braçe.
Sipas Braçes, nëse nuk adresohen problemet e gjetura gjatë dëgjesave publike në këtë komision, do të ketë probleme me financimin e fushatave elektorale në zgjedhjet e 2025-ës.
“Problem mbetet dezinformimi i brendshëm. Ngjarja e fundit tragjike e ndodhur në Tiranë pranë një shkolle e ka sjellë në vëmendje këtë gjë. Prokuroria dhe policia po bën çmos që t’i shkojë deri në fund krimit. I kemi kërkuar policisë të hetojë deri në fund një rast model dezinformimi me një synim të qartë politik që vazhdon.
Më tej, nëse ky boshllëk ligjor nuk përmbushet deri para zgjedhjeve parlamentare, do kemi probleme të mëdha në financimin e fushatave elektroale. S’kam pikë dyshimi për këtë gjë dhe do kemi probleme me dezinformimin”- shtoi deputeti.
Sipas socialistit, ka shqetësim për përpjekjen e aktorëve rusë e kinezë për të ndërhyrë në fusha të ndryshme të vendit. Versus.al
