Kryeministri Edi Rama ka reaguar ashpër pas sulmeve me raketa dhe dronë të Iran ndaj Emiratet e Bashkuara Arabe, duke i cilësuar ato si akte terroriste dhe të paprovokuara.
Në një postim në rrjetet sociale, Rama theksoi se këto sulme përbëjnë një agresion të pajustifikueshëm ndaj një shteti sovran dhe një kërcënim serioz për paqen rajonale.
“Sulmet me raketa nga Shteti terrorist i Iranit kundër Emirateve të Bashkuara Arabe, një vend mik, janë një akt i pamatur, i paprovokuar dhe krejtësisht i pajustifikueshëm agresioni kundër një shteti sovran dhe kundër vetë paqes rajonale”, u shpreh ai.
Kreu i qeverisë shqiptare theksoi se solidariteti i Shqipërisë është me udhëheqjen dhe popullin e Emirateve, ndërsa paralajmëroi se akte të tilla vetëm sa thellojnë izolimin e Iranit dhe rrisin pasigurinë në rajon.
Ai shtoi se Iran duhet të mbahet plotësisht përgjegjës për përshkallëzimin e situatës, duke e cilësuar regjimin si një burim destabiliteti që eksporton dhunë përtej kufijve të tij.
Reagimi i plotë i kryeministrit Edi Rama:
Sulmet me raketa nga Shteti terrorist i Iranit kundër Emirateve të Bashkuara Arabe, një vend mik, janë një akt i pamatur, i paprovokuar dhe krejtësisht i pajustifikueshëm agresioni kundër një shteti sovran dhe kundër vetë paqes rajonale. Emiratet e Bashkuara Arabe u përballën sërish sot me sulme me raketa dhe dronë dhe ne, Shqipëria, e dënojmë në termat më të ashpër këtë sulm terrorist nga një regjim që vazhdon të eksportojë dhunë, paqëndrueshmëri dhe pasiguri përtej kufijve të tij. Të shënjestruarit e Emirateve të Bashkuara Arabe, një vend që qëndron për paqe, progres, stabilitet dhe partneritet përtej feve, racave, gjuhëve dhe rajoneve, nuk është vetëm një sulm ndaj një shteti, por një sulm ndaj vetë mundësisë së paqes dhe sigurisë në Gjirin Persik dhe shumë më gjerë.
Solidariteti ynë i plotë është me udhëheqjen, popullin dhe mbrojtësit e Emirateve të Bashkuara Arabe. Ata që kërkojnë të terrorizojnë vendet e lira përmes raketave dhe frikësimit duhet ta dinë se akte të tilla vetëm sa thellojnë izolimin e tyre dhe forcojnë vendosmërinë e atyre që qëndrojnë për sovranitet, siguri dhe paqe globale.
Irani duhet të mbahet plotësisht përgjegjës për këtë përshkallëzim të rrezikshëm dhe, para së gjithash, për hir të vetë popullit të tij, i cili mbetet peng i një regjimi që qeveris me instinktet e Epokës së Gurit, ndërsa e tërheq një komb të lashtë gjithnjë e më thellë drejt izolimit, terrorit dhe vetëshkatërrimit./Versus.al
