Ermal Hasimja ka shpallur publikisht kandidaturën e tij për kryetar të Bashkisë së Tiranës, duke u vetëkandiduar si një alternativë e pavarur dhe përbashkuese për opozitën. Në një intervistë ekskluzive për emisionin “Review” në Euronews Albania me gazetaren Greta Topjana, Hasimja deklaroi se vendimi i tij vjen në përgjigje të thirrjes publike të liderit të PD-së, Sali Berisha, i cili ftoi emra të ndryshëm të shprehin interesin për garën, sipas kritereve të përcaktuara.
Hasimja, një prej emrave që ishte përfolur si kandidat i mundshëm, konfirmoi zyrtarisht se do të garojë për kreun e Bashkisë së Tiranës si kandidat i pavarur, pa logo partie, por duke kërkuar mbështetjen e forcave kryesore opozitare.
“Pozicioni më logjik për një opozitë të bashkuar është të dalë me një kandidat të pavarur, të mbështetur nga sa më shumë parti opozitare. Duke pasur këtë mundësi, po i drejtohem z. Berisha dhe kryesisë së PD-së, si dhe forcave të tjera opozitare, duke ju paraqitur publikisht kandidaturën time për kreun e Bashkisë së Tiranës, në përputhje me kriteret e përcaktuara prej tij”, tha Hasimja.
Me këtë lëvizje, ai bëhet kandidati i parë që vetëpropozohet publikisht për postin e kryebashkiakut të Tiranës, në një kohë kur opozita ndodhet në kërkim të një figure të unifikuar për zgjedhjet e pjesshme të 9 nëntorit. Hasimja i kërkon Berishës dhe opozitës ta shqyrtojnë zyrtarisht kandidaturën e tij si një mundësi reale për bashkimin e votës kundër mazhorancës.
