Vizita e presidentit turk Recep Tayyip Erdoğan ka qenë kryefjalë e ditës së sotme. Sot u inaugurua xhamia e Namazgjasë, më e madhja në Ballkan, mirëpo për kryetarin e Partisë Demokratike, Sali Berisha, Edi Rama nuk ka asnjë meritë. Ai thotë se ishte PD në 2013 i ktheu tokën e konfiskuar Komunitetit Mysliman dhe se vetë Rama kishte penguar në ndërtimin e saj.
“Sot inagurohet Xhamia e Namazgjasë në Tiranë! Të dashur miq, inagurimi i Xhamisë së Namazgjasë në Tiranë 11 vite pas fillimit të ndërtimit është një ngjarje e veçantë për besimtarët muslimanë të Tiranës dhe të mbarë Shqiperisë. Ky tempull fetar madhështor zbukuron gjithashtu kryeqytetin e vendit. Me këtë rast uroj nga zemra të gjithë besimtarët muslimanë të Tiranës dhe të Shqipërisë për xhaminë e re madhështore prej 5000 vendesh ku do t’i falen, luten Zotit të Madhërishëm. Të dashur miq, ndërtimi i kësaj Xhamie nisi me datë 20 prill 2013 pasi qeveria e PD i riktheu tokën e konfiskuar nga rregjimi komunist i komunitetit musliman të cilën e pengoi për 11 vite Edi Rama si Kryetar Bashkie. Projekti i saj i ishte bërë nga njëra prej studiove më të famshme në botë. Por pas zgjedhjeve Rama në një akt të papërgjegjshëm e ndërpreu ndërtimin Xhamisë së Namazgjasë. Fillimi i ndërtimit të xhamisë u inagurua për së dyti me datë 20 prill 2015, por me projekt të ndryshuar dhe në prani të njeriut që e kishte penguar me të gjitha mënyrat rikthimin e tokës Komunitetit Musliman dhe ndërtimin e Xhamisë, Edi Ramës dhe Presidentit të Republikes së Tuqisë Erdogan i cili me sa duket ndikoi tek Rama që të mos pengonte ndërtimin e saj dhe mori përsipër financinin e ndërtimit të xhamisë”, shkruan Berisha.
Sipas tij, fakti që në krye të saj nuk është drejtuesi i Komunitetit Mysliman Shqiptar, është e papranueshme dhe tregon ndërhyrje të Turqisë në vendin tonë.
“Xhamia është dhuratë e besmitarëve muslimanë turq për besimtarët muslimanë të Tiranës ndaj dhe gjej rastin t’ju shpreh atyre mirënjohejen më të thellë për bujarinë e tyre. Mirpo kjo bujari e besimtarëve muslimanë të Turqisë u përdor nga Edi Rama për qëllime politike, por dhe më keq për të ngjallur farën e përçarjes së muslimanëve shqiptarë siç bëri së fundmi me shtetin e pavarur islamik Bektashi. Nën këtë moto të përçarjes sot në shkelje e statutit 100-vjeçar të KMSH nuk do jetë në inagurim Kryetari i Komunitetit Musliman Shqiptar dhe ky është një ofendim për të gjithë besimtarët musliman të Shqipërisë qe ai në mënyrë legjitime përfaqëson. Partia Demokratike nuk pajtohet me këto ndërhyrje antikushtetuese të papranueshme politike nga brenda apo nga jashtë në çështjet e besimeve fetare Ajo e konsideron tolerancën dhe bashkëpunimin e shkëlqyer ndër fetar si një vlerë hyjnore të shqiptarëve dhe garanton besimtarët muslimanë dhe të krishterë shqiptarë se kjo parti në respekt të plotë të lirisë se besimit të qytetarëve shqiptarë do të ruaj të paprekur parimin Kushtetues të ndarjes së shtetit nga besimet fetare në Shqipëri”, përfundon Berisha.
Me inaugurimin e xhamisë, është mbyllur edhe vizita e Erodgan në Tiranë. Ai u takua fillimisht me homologun e tij, presidentin Begaj dhe më pas patën edhe një konferencë të përbashkët për shtyp me kryeministrin Edi Rama. Erdogan nuk nguroi të përcillte mesazhe edhe për luftën në Gaza duke thënë se duhet të jenë të gjithë bashkë “Kundër terrorizmit shtetëror të Izraelit”. Xhamia e Namazgjasë do t’u shërbejë 10 mijë besimtarëve. Në krye të saj do të jetë kryemyftiu i Tiranës, Bilal Teqja./Versus.al
