Kreu i Partisë Demokratike Sali Berisha ka folur në një deklaratë për mediat për 14 vjetorin e vrasjes së 4 protestueve më 21 janar, kur qeveria e tij ishte në pushtet.
Ai tha se që në orët e para pas ngjarjes, ka kërkuar kërkim ndërkombëtar dhe shtoi se edhe institucionet e huaja ishin shprehur se protesta kishte axhendë politike. Sipas tij edhe SHBA asokohe kërkoi hetimin nga polici e deri tek organizatori kryesocialisti Edi Rama.
“Së pari, keqardhjen time e kam shprehur për viktimat jo pas 14 viteve, siç pretendoni ju, apo ata që mendojnë si ju, por e kam shprehur fiks në ora 7 të darkës të asaj nate. Pra me datën 21 janar të vitit 2011 dhe në mënyrë të përsëritur. Së dyti, po atë natë dhe të nesërmen, të pasnesërmen, kam kërkuar një hetim ndërkombëtar. Kam kërkuar jo hetim, por hetim ndërkombëtar të çështjes. Institucionet më serioze ndërkombëtare janë shprehur se ajo protestë e dhunshme kishte axhendë politike.
Së treti, edhe njëherë ka një deklaratë të qeverisë së SHBA, në të cilën kërkohet hetimi që nga polici tek organizatori që publikisht dhe botërisht është Edi Rama”- u shpreh Berisha.
Sa i takon hetimit të ngjarjes, Berisha u shpreh se prokuroria ka qenë tërësisht nën kontrollin e kryeministrit Edi Rama edhe kur ky i fundit ishte vetëm kryetar i opozitës.
“Së katërti, ata që nuk duan të mashtrojnë veten dhe nuk duhet t’i përdorin fatkeqësitë e të tjerëve për ushqim politik, duhet ta dinë se në këto 14 vite, prokuroria ka qenë tërësisht nën kontrollin e Edi Ramës. Ishte Ina Rama prokurore, që unë e akuzova për puçiste, që refuzoi prokurorin ndërkombëtar.
Dhe pas vitit 2013, njëri pas tjetrit prokurorë nga Arta Marku, Olsi Çela etj, njeri tjetër përveç Edi Ramës nuk i ka penguar ata të hetojnë në çdo aspekt”- shtoi ai.
Ish-kryeministri pretendoi se ngjarja është përdorur për qëllime politike dhe se u fsheh përgjegjësia e organizatorëve të protestes e cila sipas tij ishte planifikuar me qëllim që Rama të fitonte pushtetin me çdo kusht. Ndërsa e mbylli fjalën e tij duke thënë se mbështet hetimin e ngjarjes.
“Por përdorimi politik i kësaj ngjarje tragjike, ku u sollën për qëllime të mirëfillta politike, për të pushtuar kryeministrinë Edi Rama, se donte sipas shumë gjasave të mbante edhe një fjalim, është totalisht dëshmi e keqpërdorimit total të kësaj ngjarje kryekëput për qëllime politike dhe për të fshehur përgjegjësinë e organizatorëve që sollën njerëz në një protestë, më të dhunshmen që ka pasur Shqipëria në 32 vite.
Jam shprehur, shprehem dhe do shprehem, mbështes çdo lloj hetimi të kësaj ngjarje,por gjithashtu deklaroj se nuk ka asgjë tjetër vetëm për të shpëtuar përgjegjësinë e atij që organizoi protestën më të dhunshme për qëllime të pushtetit të tij, Edi Ramës”- deklaroi ish-kryeministri.
Për vite me radhë, familjarë të viktimave dhe jo vetëm, kanë akuzuar Sali Berishën se si kryeministër i asaj kohe, ka urdhëruar të hapej zjarr ndaj protestuesve të mbledhur më 21 janar 2011 pas skandalit ku shfaqej Ilir Meta duke kërkuar ryshfet 700 mijë euro. Versus.al
