Ish-deputeti Ervin Salianji, tashmë i burgosur për akuzën ‘kallëzim i rremë’ ka reaguar pas përplasjeve të deputetëve të opozitës gjatë ditës së sotme në Kuvend.
Përreth 2 orë këta të fundit tentuan të bllokonin punimet e seancës parlamentare çka çoi në përplasje dhe fizike me deputetët socialistë dhe punonjësit e Gardës së Republikës.
Salianji e ka cilësuar hipokrizi neveritëse shfaqjen e agresorëve, siç i quan ai kundërshtarët e tij politik, si viktima. Gjithashtu ai është shprehur se pas vrasjes, burgosja politike është forma më e rëndë e dhunës.
Reagimi i tij:
“Shfaqja e agresorëve si viktima, e dhunuesve si të dhunuar, e abuzuesve si të prekur nga prekja e pronës publike është hipokrizi neveritëse.
Njësoj siç vjedhin dhe përgjegjësinë e mbajnë denoncuesit, siç shkretojnë dhe shkatërrojnë, siç e ndajnë Shqipërinë si plaçkë lufte për bandat dhe mes bandave, siç përndjekin administratën, shkatërrojnë meritokracine, sot po përpiqen të sillen si viktima.
Dhuna dhe brutaliteti më i madh është eleminimi i kundërshtarit politik duke asgjësuar dhe nënshtruar institucionet. Duke përdorur institucionet, si komisionet e partisë, për të fshikulluar dhe hequr lirinë dhe asgjësuar të drejtat.
Krimi më i madh është shkatërrimi i demokracisë, shtetit të së drejtës dhe sundimit të ligjit. Pas vrasjes, burgosja politike është forma më e rëndë dhe më brutale e dhunës. Opozita po mbrohet dhe po mbron demokracinë dhe interesin publik”-thuhet në reagimin e Salianjit.
