Sot në orën 19:00, pritet të mbahet protesta e thirrur nga Partia Demokratike për mbylljen e rrjetit social “TikTok”. Demonstrata e thirrur nga kryedemokrati Sali Berisha do të mbahet para kryeministrisë.
Vetë kreu i PD e cilësoi si “akt censure”, vendimin e qeverisë për mbylljen e TikTok, duke argumentuar se gjithçka bëhej në kuadër të zgjedhjeve të 11 majit, me qëllim që të rinjtë të mos informoheshin plotësisht për problematikat në vend.
Ai u bëri thirrje të rinjve, nxënësve dhe studentëve që të bashkohen në protestë për të mbrojtur lirinë e fjalës dhe të drejtat e tyre në internet.
“Të protestojmë në orën 19:00 në sheshin ‘Skënderbej’ të Tiranës, të gjithë të rinjtë. Ju kalorës mbrojtës të saj, të mblidhemi të gjithë për të mbrojtur lirinë e shprehjes”, tha Berisha, duke premtuar se në rast të rikthimit të PD në pushtet, rrjeti social do të rihapet në vend që prej datës 12 maj. Versus.al
