Në një konferencë për mediat, kryetari i Partisë Demokratike, Sali Berisha doli në mbështetje të protestës së thirrur nga Partia e Lirisë përballë SPAK-ut më 6 dhjetor.
Ai tha se pavarësisht se vëmendja e opozitës duhet të jetë tek qeveria Rama, nuk mund të injorohet SPAK pasi sipas tij është “prokuroria politike” e Ramës.
"Çështja në themel e debatit është se, SPAK nuk ka pse të jetë axhendë e opozitës, se opozita nuk duhet të merret me SPAK, por duhet të merret me Edi Ramën. Është shumë e drejtë që opozita të merret dhe po merret çdo ditë me Edi Ramën, por do të ishte fatale sikur opozita të injoronte SPAK, aktualisht prokurorinë politike të Edi Ramës. Nëqoftëse opozita injoron SPAK, opozita harron që është shndërruar sot në njërin nga institucionet më themelore të narkodiktaturës"- deklaroi kryedemokrati.
Ai tha se protesta e thirrur para SPAK lidhet me kreun e SPAK Altin Dumanin si prokuror i çështjes së Metës.
“Pra pa diskutim që do të mbështetet çdo protestë kundër diktaturës, kudo që të thirret dhe kundër cilido. Nuk ka diskutim. Ndaj të gjithëve. Si jo. Detyrimi, akti lidhet direkt me Altin Dumanin. Pse lidhet direkt? Ligji e detyron prokurorin të përcaktojë dhe të ndjekë procedurën ndaj personit që ka marrë nën hetim, apo të pandehur”- shtoi Berisha.
Sa i takon aksionit të mëtejshëm politik, Berisha tha se mosbindja civile do të vijojë deri në ditët para zgjedhjeve parlamentare të 2025-ës, duke nënvizuar qëllimin kryesor të opozitës për krijimin e një qeverie teknike. Versus.al
