Kryeministri Edi Rama ka falenderuar të gjithë shqiptarët që votuan nga shtete të ndryshme pas rezultateve të numërimit të votave të diasporës. Videon falenderuese në rrjetet sociale, Rama e ka shoqëruar me mbishkrimin se ky rezultat është një mesazh i fuqishëm që i jepet qeverisë.
“MIRËMËNGJES dhe me një falenderim krejt të posaçëm, për shqiptarët që nga Greqia, Italia, Amerika, e çdo anë e Europës dhe botës iu bashkuan trenit të fitores duke e bërë atë edhe më domethënëse, jo thjesht për nga numrat po në radhë të parë për nga mesazhi i fuqishëm i shumicës së tyre dërrmuese, i cili do të na bëjë edhe më të përkushtuar për Shqipërinë 2030 në BE, ju uroj një ditë të mbarë”- shkruan kreu i qeverisë.
Pavarësisht akuzave të opozitës për parregullsi dhe manipulim të vullnetit të zgjedhësve, votat e diasporës, i dhanë qeverisë një mbështetje të qartë prej 122.236 votash ose 61.15% të totalit. Versus.al
