Zëvendës kryeministrja Belinda Balluku ka dhënë një deklaratë për mediat ku është pyetur lidhur me skandalin e transportit ndëkombëtar 800 ton mbetjeve toksike nga Porti i Durrësit për në Tajlandë.
Ajo hoqi përgjegjësinë nga Porti i Durrësit, duke theksuar se po kryhen hetimet ndërsa u kërkoi gazetarëve që të mos përpiqen të fajësojnë Autoritetin Portual por të analizojnë përgjegjësinë e koncesionarëve të cilët operojnë aty. Ndër të tjera, Balluku theksoi se transporti i mbetjeve është bërë në kuadër të kodeve dhe procedurave të përcaktuara nga Bashkimi Europian.
“Do i kërkoja medias të jetë e kujdesshme kur trajton këtë çështje. Analizat që kam dëgjuar deri sot prekin imazhin e qeverisë. Ka një protokoll të mirëfilltë të vendsur për të cilin ministria e Turizmit ia ka bërë me dije të gjithë mediave që kanë pasur interes për këtë çështje.
Deri në ditën që kanë marrë këto përmasa, Porti i Durrësit nuk ka asnjë lidhje me këtë proces. Ka të bëjë me koncesionarin që ka kryer të gjithë këto transporte. Porti i Durrësit me koncesionarin që ka kryer transportin e këtyre mbetjeve janë konkurrentë. Qeveria është angazhuar që në ditën e parë në bashkëpunim me OLAF”- tha Balluku.
“Nuk na ka rezultuar deri tani që të themi se ka ndodhur diçka që fajëson një entitet apo institucion. Unë them se duhet të lexoni fushën e përgjegjësisë së Portit të Durrësit. Në port operojnë koncesionarë. Nuk po them se ata janë fajtorë. Fjala faj nuk duhet përdorur, sepse për këtë process ka nisur një hetim si nga autoritetet shqiptare po ashtu edhe nga OLAF. Deri tani nuk ka asnjë rezultat të këtij hetimi”- theksoi zv.kryeministrja.
Përsa i përket komanisë Kurum që shkarkoi nga puna 500 punonjës pasi prokuroria e Durrësit nisi hetimet për mbetjet, Balluku tha se në raste të tilla kur kompania ka shpallur vështirësi në financa, bëhet rishikimi i kontratave të punonjësve.
Për skandalin u pyet edhe ministri i ri i Mbrojtjes, Pirro Vengu i cili më herët ka mbajtur postin e drejtorit të Portit të Durrësit. Por ai iu përgjigj gazetarëve duke thënë se nuk ndodhej para tyre në cilësinë e postit që ka pasur më herët por si ministër i dikasterit të Mbrojtjes duke shtuar se Balluku u kishte dhënë përgjigjie pikëpyetjeve lidhur me këtë çështje. Versus.al
