Prokuroria e Posaçme kundër Korrupsionit dhe Krimit të Organizuar (SPAK) ka refuzuar kategorikisht kërkesën e Komisionit Parlamentar “Për Nismat Qytetare, Bashkëpunimin dhe Mbikëqyrjen Institucionale”, të drejtuar nga deputeti socialist Fatmir Xhafaj, për një vizitë monitoruese në ambientet e saj.
Kërkesa parashikonte një takim dhe vizitë më 6 shkurt 2026, me fokus te rezultatet e SPAK në luftën kundër pastrimit të parave.
Por, drejtuesit e SPAK-së, në krye me kryeprokurorin Klodian Braho, e kanë cilësuar këtë nismë si një ndërhyrje të paligjshme dhe të drejtpërdrejtë në pavarësinë kushtetuese të institucionit, duke vendosur kështu “vijat e kuqe” të qarta ndaj çdo forme monitorimi parlamentar që mund të shihen si presion ose ndikim politik.
Në përgjigje të refuzimit, kryetari i komisionit Fatmir Xhafaj ka sqaruar se vizitat e tilla monitoruese janë një praktikë e vendosur parlamentare, pa karakter ndërhyrës, dhe shërbejnë pikërisht për të forcuar bashkëpunimin institucional midis pushteteve.
Ai theksoi se Shqipëria është republikë parlamentare, ku Kuvendi ushtron mbikëqyrje kushtetuese pa cenuar pavarësinë e institucioneve të drejtësisë, duke promovuar dialogun dhe kulturën e bashkëpunimit.
Ky refuzim vjen në një moment kur SPAK ka intensifikuar hetimet në disa çështje të mëdha, dhe ka nxitur reagime të ndryshme politike, përfshirë nga opozita që e sheh si mbrojtje të pavarësisë, ndërsa mazhoranca e quan të nevojshme për transparencë dhe mbikëqyrje institucionale./Versus.al
