Kryeministri Edi Rama do të presë nesër në Tiranë Presidenten e Komisionit Europian, Ursula von der Leyen, në një vizitë zyrtare që pritet të fokusohet tek procesi i integrimit të Shqipërisë në Bashkimin Europian.
Ceremonia zyrtare e mirëseardhjes do të zhvillohet në Bulevardin “Dëshmorët e Kombit”, ndërsa më pas dy liderët do të zhvillojnë një takim kokë më kokë, i ndjekur nga një takim bilateral mes delegacioneve respektive.
Në përfundim të takimeve, është parashikuar një konferencë e përbashkët për shtyp, ku Rama dhe von der Leyen do të ndajnë detaje mbi diskutimet dhe perspektivat e bashkëpunimit mes Shqipërisë dhe BE-së.
Vizita e Presidentes së Komisionit Europian në Tiranë është pjesë e turit të saj në Ballkanin Perëndimor, që synon të riafirmojë mbështetjen e Bashkimit Europian për procesin e zgjerimit dhe për të promovuar “Planin e Rritjes” prej 6 miliardë eurosh të BE-së për rajonin, që mbulon periudhën 2024–2027.
