Qeveria ka vendosur të shtyjë afatin për ligjin e investimeve strategjike. Projektligji është dorëzuar në Kuvend dhe parashikon që ky afat të shtyhet deri në 31 dhjetor të vitit 2026, nga fundi i këtij viti që ishte limiti.
Sipas arsyetimit të dhënë vendimi për zgjatjen e afatit është marrë për shkak të interesit të subjekteve për këtë paketë ligjore. Në projektligj gjithashtu propozohet zgjerimi i sektorëve ku do të lejohen investimet strategjike me kusht që vlera e investimit të jetë 50 milionë euro apo më shumë.
Që prej hyrjes në fuqi të ligjit të investimeve strategjike e deri më tani janë trajtuar 108 projekte, prej të cilave: 48 kanë përfituar status strategjik, 30 projekte janë refuzuar dhe 31 projekte janë në fazë vlerësimi.
Ky është një ligj që ka ngjallur shumë debate mes qeverisë dhe opozitës pasi kjo e fundit pretendon se statusi i “investitorit strategjik” po u jepet personave që kanë lidhje me eksponentë të PS. Si në rastin e biznesmenit Artan Gaçi, bashkëshortit të deputetes Olta Xhaçka i cili e mori statusin e investitorit strategjik gjatë kohës që Xhaçka ishte ministre. Vetë Bashkimi Europian ka bërë thirrje për rishikimin e ligjit të investitorëve strategjikë. Versus.al
