Kryetari i Partisë së Lirisë, Ilir Meta në një konferencë për mediat foli lidhur me çështje të caktuara ku sipas tij duhet të ketë një ndërhyrje të menjëhershme të qeverisë. Ndërsa i pyetur nga gazetarët për ndryshimet në kabinetin qeveritar, Meta i cilësoi ato si “larje hesapesh” të ndarjeve brenda Partisë Socialiste.
Ai tha se Rama caktoi si ministra të rinj persona anonimë të cilët do t’i shërbejnë atij për të firmosur çdo gjë që u kërkon.
“Ndryshimet janë tregues i kalbëzimit dhe larje hesapesh brenda PS. Hiqen disa persona të cilët kanë patur një kontribut të caktuar në parti dhe vendosen disa anonimë që do firmosin gjithçka që do u kërkojë Rama”- tha Meta.
Ndër të tjera ai foli edhe për zgjedhjet parlamentare të 2025-ës, ku u shpreh i bindur se do të thyejë disa herë herësin e caktuar, si kandidat për deputet në qarkun e Tiranës.
“Kush e vë në dyshim se unë do jem kandidat në kryeqytet, bën gabim shumë dhe besoj se do thyej disa herë herësin”- shtoi kreu i PL.
Ndërsa për ndryshimet në Kodin Zgjedhor Meta pati të njëjtin qëndrim me Berishën duke thënë se asnjë prej rekomandimeve të OSBE-ODIHR nuk u zbatua dhe se nuk kemi të bëjmë me Reformë Zgjedhore. Herësi i vendosur me ndryshimet në Kodin Zgjedhor është 7 mijë vota. Ndërsa vetëm 1/3 e listës së kandidatëve do t'u jepet e hapur votuesve në ditën e zgjedhjeve pasi pjesa tjetër caktohen nga kryetarët. Versus.al
