Një ngjarje e rëndë dyshohet të ketë ndodhur mëngjesin e sotëm në një objekt në rrugën “Tirana” në Prishtinë. Disa persona dyshohet se e kanë droguar e më pas përdhunuar një vajzë të mitur dhe për rastin tashmë ka nisur hetimet Policia dhe Prokuroria, raportojnë mediat në Kosovë që kanë publikuar detajet e këtij rasti të tmerrshëm për të cilin Policia është vënë në dijeni gjatë ditës.
Viktima është një vajzë e moshës 14-vjeçare, e cila ka rrëfyer në Polici se ngjarja ka ndodhur mbrëmë pas mesnate në një objekt në ndërtim e sipër.
Sipas informacioneve të para të bëra publike nga "Sinjali", bëhet fjalë për pesë persona, që dyshohen se kanë abuzuar seksualisht me viktimën e të cilët akoma nuk janë identifikuar.
Burimet thonë se të dyshuarit fillimisht e kanë detyruar vajzën të konsumojë substanca narkotike dhe pasi e kanë droguar, dyshohet se e kanë dhunuar.
E mitura është gjetur diku në një rrugë të kryeqytetit në orët e mëngjesit dhe më pas është njoftuar Policia.
Me urdhër të Prokurorit të Shtetit, hetimi tashmë është iniciuar dhe po ndërmerren veprimet e nevojshme për zbardhjen e rrethanave të rastit.
