Policia greke ka arrestuar katër persona të dyshuar për përfshirje në vrasjen e mafiozit grek Jorgos Moskouris, 55 vjeç, i njohur me nofkën “Thamnakia”, ngjarje e ndodhur më 24 prill 2025 në zonën e Halandrit në Athinë.
Sipas autoriteteve greke, mes të arrestuarve janë dy shtetas me origjinë shqiptare, Dionis Kokoni dhe një person me mbiemër Jupe, si dhe dy shtetas grekë, Dhimitris Aleksopoulos dhe Alexandros Petropoulos.
Hetuesit dyshojnë se ata kanë luajtur rol logjistik në organizimin e atentatit, duke ndihmuar me sigurimin e armëve, automjeteve dhe mbështetjes për ekzekutorët e drejtpërdrejtë, të cilët dyshohet se kanë hyrë në Greqi posaçërisht për kryerjen e vrasjes dhe janë larguar menjëherë pas saj.
Jorgos Moskouris u qëllua me armë automatike jashtë një klinike private në Halandri, në momentin kur po i afrohej automjetit të tij.
Sulmi u krye në mënyrë të shpejtë dhe profesionale, duke mos i lënë atij asnjë mundësi reagimi, ndërsa ai mbeti i vdekur në vendngjarje.
Hetimet e deritanishme tregojnë se bëhet fjalë për një ekzekutim të lidhur me krimin e organizuar ndërkombëtar, ku në fokus janë përplasjet për kontrollin e kontrabandës së duhanit dhe aktiviteteve të tjera ilegale.
Në dosjen hetimore përmendet edhe një figurë e njohur me nofkën “Entik”, që dyshohet se vepron në rrjete mafioze me bazë në Dubai dhe lidhje me struktura kriminale rusishtfolëse.
Po ashtu, hetimi përfshin edhe emrin e Janis Lalas, një person që më parë kishte bashkëpunuar me viktimën dhe më pas dyshohet se është afruar me grupe rivale kriminale, çka e bën edhe më komplekse pistën e hetimeve.
Sipas policisë greke, atentati është realizuar me pritë të organizuar jashtë klinikës, ku autorët kanë hapur zjarr me armë automatike, ndërsa më pas janë larguar me një automjet të vjedhur, i cili u gjet më vonë i djegur në zonën e Patimas në Halandri, në përpjekje për të zhdukur provat.
Megjithëse janë bërë arrestimet e para, autoritetet theksojnë se ekzekutorët e drejtpërdrejtë të vrasjes mbeten ende në arrati dhe kërkimet për identifikimin dhe kapjen e tyre po vazhdojnë intensivisht./Versus.al
