Policia e Tiranës ka njoftuar masat e sigurisë dhe kufizimet e qarkullimit për protestën e paralajmëruar nga Partia Demokratike e Shqipërisë, e cila do të mbahet mbrëmjen e 8 majit para godinës së Kryeministrisë.
Sipas njoftimit zyrtar, përfaqësues të Partisë Demokratike kanë informuar policinë se tubimi do të zhvillohet në orën 19:00 në bulevardin Dëshmorët e Kombit.
Në kuadër të planit të masave, nga ora 23:45 e datës 7 maj deri në përfundim të protestës, do të bllokohet lëvizja dhe nuk do të lejohet parkimi i automjeteve në segmentin e bulevardit “Dëshmorët e Kombit”, nga “Ura e Dajtit” deri te rruga “Ismail Qemali”.
Ndërkohë, nga ora 15:00 e datës 8 maj dhe deri në përfundim të tubimit, do të ketë bllokim të qarkullimit në bulevardin “Dëshmorët e Kombit”, nga kryqëzimi pranë Ministrisë së Brendshme deri te sheshi Sheshi Nënë Tereza, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.
Policia apeloi ndaj organizatorëve që të respektojnë afatin kohor dhe vendin e përcaktuar për tubimin, ndërsa u kërkoi qytetarëve mirëkuptim për kufizimet e përkohshme në qarkullim.
Gjithashtu, autoritetet u bënë thirrje pjesëmarrësve që të distancohen nga çdo veprim i kundërligjshëm që mund të cenojë rendin dhe sigurinë publike.
Njoftimi i policisë:
DVP Tiranë
Përfaqësues të subjektit politik Partia Demokratike e Shqipërisë kanë njoftuar Policinë e Tiranës për zhvillimin e një tubimi, më datë 08.05.2026, në orën 19:00, në bulevardin “Dëshmorët e Kombit”, para godinës së Kryeministrisë.
Në bazë të ligjit “Për tubimet”, Policia e Tiranës ka marrë masat me qëllim garantimin e mbarëvajtjes së tubimit në vendin dhe afatin kohor të kërkuar.
Në zbatim të këtyre masave, ditën e sotme dhe të nesërme, do të kufizohet lëvizja në disa akse/segmente rrugore, konkretisht:
nga ora 23:45 e datës 07.05.2026 deri në përfundim të tubimit, do të bllokohet lëvizja dhe nuk do të lejohet parkimi i automjeteve në bulevardin “Dëshmorët e Kombit”, nga vendi i quajtur “Ura e Dajtit” deri në rrugën “Ismail Qemali”;
nga ora 15:00 e datës 08.05.2026 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.
Policia e Tiranës apelon për organizatorët e tubimit për respektimin e afatit kohor dhe vendit ku do të zhvillohet tubimi, si dhe kërkon mirëkuptimin e qytetarëve për kufizimin e lëvizjes me automjete.
Gjithashtu, apelon që të distancohen në rast se gjenden përballë veprimeve të kundërligjshme që cenojnë rendin dhe sigurinë publike./Versus.al
