Drejtori i Përgjithshëm i Policisë së Shtetit, Ilir Proda i zgjedhur në detyrë pak ditë më parë, ka mbledhur sot në një takim drejtuesit e policisë nëpër qarqe për t’u dhënë disa porosi lidhur me situatën e rendit dhe sigurisë në vend.
Ai u kërkoi drejtuesve të policive vendore, analiza 9 mujore dhe mbajtjen e raporteve të performancës së çdo punonjësi. Ndërsa theksi i takimit ishte tek mbajtja nën kontroll e situatës kriminale në vend, duke pasur parasysh që ditët e fundit janë shtuar ngjarjet kur ka pasur vrasje dhe plagosje me armë zjarri. Proda u kërkoi efektivëve që të ndjekin me themel konfliktet që kanë qytetarët me njëri-tjetrin dhe ankesat që kanë ata për çështje të ndryshme.
“Analizat 9-mujore, performanca e punës së çdo punonjësi të policisë, duke filluar nga Drejtori i Drejtorisë Vendore deri te punonjësi i rolit bazë, mbajtja nën kontroll e situatës kriminale dhe rritja akoma më shumë e parametrave të sigurisë publike dhe rrugore, lufta kundër trafiqeve të paligjshme dhe çdo paligjshmërie që shfaqet në territor, si dhe ndjekja në dinamikë e konflikteve dhe ankesave të qytetarëve ishin disa nga porositë e dhëna nga Drejtori i Përgjithshëm i Policisë”- thuhet në njoftimin e policisë.
Rritje e vigjilencës është kërkuar edhe për trafikantët dhe personat e shpallur në kërkim.
Kujtojmë se pas përzgjedhjes së kreut të ri të policisë së shtetit, edhe drejtorët vendorë të policisë do t’i nënshtrohen një procedure të ngjashme me përzgjedhje nga komisioni i posaçëm i ngritur nga ministria e Brendshme. Versus.al
