Ditën e sotme ka nisur gjyqi në themel në Gjykatën e Posaçme të Apelit për Korrupsion dhe Krimin e Organizuar (GJKKO) për të shumëkërkuarin Dritan Rexhepi i cili u ekstradua dy ditë më parë nga Turqia.
Rexhepi i cili ishte i pranishëm në seancë lidhur me procesin që kishte nisur në mungesë të tij për rrëmbimin, vrasjen dhe zhdukjen e Jan Prengës është shprehur dakort me trupin gjykues i cili përbëhet nga Floreja Davidhi relatore, Elsa Ulliri dhe Rudina Palloi anëtare.
Përmes avokates së tij, Johana Qeleshi, 44 vjeçari, i njohur dhe me emrin Gramos Rexhepi kërkoi lirimin nga qelia me pretendimin se mbahet në arrest pa asnjë provë.
Pasi u konfirmua masa e arrestit, nisi seanca gjyqësore për rrembimin dhe zhdukjen e Jan Prengës, ku Rexhepi akuzohet si urdhërues i krimit. Dritan Rexhepi pasi dha gjeneralitetet deklaroi se do të jetë vetë i pranishëm në çdo seancë pavarësisht mbrojtjes me avokat.
Në këto kushte GJKKO vendosi të shtyjë seancën për të lejuar Dritan Rexhepin që të njihet me aktet e procesit të zhvilluar deri tani. Seanca e ardhshme do të zhvillohet më 24 janar, në orën 12:00.
Personat të cilët po gjykohen për vrasjen dhe rrëmbimin e Jan Prengës janë: Dritan Rexhepi, Gentjan Funiqi, Aldo Majnishta, Korada (G) Kështenja, Artan Doccaj, Geraldo Martini dhe Martin Bleta.
Më herët për vrasjen e Jan Prengës është dënuar përjetë kopshtari i kompleksit “Golden” Festim Bixhdili, për të cilin Gjykata e Lartë ktheu për rigjykim çështjen në Apelin e Posaçëm. Ndërkohë Altin Hajri po gjykohet i veçuar për të njëjtën ngjarje. Të arrestuar deri tani Dritan Rexhepi, Aldo Majnishta dhe Festim Bixhdili./Versus.al
