Një ngjarje e frikshme ndodhi mbrëmjen e së premtes në lagjen “Partizani” në Vlorë, ku Bakije Zoto, 63 vjeç, nëna e Gentian Zotos, i dënuar me 35 vite burg për përfshirje në atentatin kundër Inez Hajrullës më 10 maj 2019, u gjet e rrezikuar pas shpërthimit të një lënde eksplozive të vendosur në portën e banesës së saj.
Gentian Zoto është një nga personat e dënuar nga Gjykata e Apelit si pjesë e grupit që kreu atentatin ndaj Hajrullës. Për të njëjtin rast, të dënuar janë edhe Daut Elmazi, Igli Memaj, Serxho Ademi dhe Albano Goxhaj.
Atentati ndaj Inez Hajrullës kishte ndodhur në një lokal në qytet, ku ai ndodhej në shoqërinë e Ervis Matodashajt. Sipas hetimeve, disa persona qëlluan drejt tij me qëllim për ta vrarë. Gjatë incidentit, rastësisht u plagos Dajko Canodemaj, i cili ishte duke pirë kafe në afërsi. Nga vendi i ngjarjes u gjetën dy gëzhoja dhe një fishek i pa goditur.
Nga analizimi i kamerave të sigurisë, rezulton se një automjet tip “Land Rover” u afrua në shëtitoren “Lungomare” dhe nga dera e pasme e mjetit zbriti një person. Në atë moment, gjashtë persona që ndodheshin në tavolina u ngritën dhe ikën me vrap. Pamjet e sigurisë tregojnë gjithashtu Inez Hajrullën duke qëlluar drejt “Land Rover”-it, ndërsa armën ia mori nga dora Ervis Matodashaj, i cili më pas u largua.
Gjatë ikjes, automjeti i agresorëve u përplas me dy makina të rastit pranë bashkisë Vlorë dhe më pas vazhdoi drejt fshatit Babicë. Policia iu vu menjëherë pas automjetit dhe në afërsi të fshatrave Babicë e Vogël dhe Çeprat, makina u gjet e djegur. Brenda saj ishin djegur dy automatikë dhe një dorezë plastike pjesërisht e djegur.
Hetimet për zbardhjen e plotë të ngjarjes dhe identifikimin e autorëve vijojnë nën drejtimin e autoriteteve lokale.
