Këshilli i Emërimeve në Drejtësi ka publikuar sot renditjen e kandidatëve për vendin e shpallur vakant në Gjykatën Kushtetuese për të zëvendësuar Holta Zaçajn, mandati i së cilës konsiderohet i përfunduar që më datë 10 mars 2025.
I pari në renditje është gjyqtari Asim Vokshi me 89.5 pikë, i ndjekur nga Naureda Llagami me 89.3 pikë.
Njoftimi i plotë:
Këshilli i Emërimeve në Drejtësi (KED), në vijim të procedurave të vlerësimit të kandidaturave për të cilët është vendosur lejimi për konkurimin në vendin vakant në Gjykatën Kushtetuese, në zbatim të dispozitave ligjore, pas shqyrtimit të gjithanshëm të dokumentacionit të paraqitur nga vetë kandidatët dhe atij të siguruar nga ky Këshill si dhe komunikimit me institucionet e tjera lidhur me të dhënat e nevojshme për vlerësimin e kandidaturave, bën publike rezultatin e vlerësimit dhe pikëzimit të kandidatëve, sipas kësaj renditje:
1) Asim Vokshi 89.5 pikë;
2) Naureda Llagami 89.3 pikë;
3) Florian Ballhysa 77.83 pikë;
4) Alma Faskaj 77.77 pikë;
5) Genta Tafa (Bungo) 75.44 pikë;
6) Alban Toro 74.22 pikë.
Në zbatim të nenit 239 të ligjit nr. 115/2016 dhe Vendimit nr. 5 datë 02.04.2019 “Për kriteret dhe procedurën e vlerësimit, pikëzimit dhe renditjes së kandidatëve për pozicionet vakante në Gjykatën Kushtetuese dhe të Inspektorit të Lartë të Drejtësisë”, KED do të miratojë edhe Raportin e arsyetuar për procedurën e verifikimit, të vlerësimit dhe pikëzimit të secilit kandidat dhe të renditjes përfundimtare të tyre, me qëllim dërgimin e tij më pas te organi i emërtesës, Gjykata e Lartë.
Ndërkohë nga ana tjetër Holta Zaçaj e cila është edhe kryetarja aktuale e Gjykatës Kushtetuese ka deklaruar se nuk ka ndërmend të njohë 10 marsin si datë për përfundimin e mandatit me arsyetimin se ajo nuk e ka përmbushur të plotë mandatin e saj 9 vjeçar si anëtare e kësaj gjykate. Versus.al
