Policia e Tiranë ka finalizuar operacionin e koduar “Kontigjenti”, duke parandaluar një ngjarje të mundshme kriminale dhe ka zbardhur dy ngjarje të mëparshme të ndodhura në zonën e Paskuqanit.
Gjatë operacionit, shërbimet e Komisariatit të Policisë Nr. 5, në bashkëpunim me strukturat për hetimin e krimeve të rënda, kanë arrestuar 37-vjeçarin, Perikli Doçi i cili lëvizte me një motomjet pa targa dhe nuk iu bind urdhrit të policisë për ndalim, duke tentuar të largohej me shpejtësi.
Pas ndjekjes policore, ai u kap në afërsi të liqenit të Paskuqanit. Në momentin e ndalimit, 37-vjeçari kishte vendosur një maskë silikoni, ndërsa gjatë kontrollit iu gjetën dhe sekuestruan sasi lënde eksplozive gati për shpërthim, 10 litra lëndë djegëse, një armë zjarri me municion, si dhe motomjeti i dyshuar i vjedhur.
Nga hetimet paraprake dyshohet se ai është i përfshirë në dy ngjarje kriminale të mëparshme: një sulm me armë zjarri ndaj një banese në Paskuqan dhe një shpërthim me lëndë plasëse në një tjetër banesë, të cilat kanë shkaktuar vetëm dëme materiale.
Policia vijon hetimet për identifikimin e bashkëpunëtorëve të mundshëm dhe zbardhjen e plotë të aktivitetit të dyshuar kriminal, ndërsa materialet i janë referuar Prokurorisë së Tiranë për veprime të mëtejshme.
Njoftimi i policisë:
DVP Tiranë/Finalizohet operacioni i koduar “Kontigjenti”.
Parandalohet një ngjarje e mundshme kriminale kundër personit dhe pronës, si dhe zbardhen 2 të tilla, të kryera nga një shtetas me rrezikshmëri të lartë shoqërore.
Kapet, si rezultat i ndjekjes policore, një 37-vjeçar që kishte siguruar, për qëllime kriminale, lëndë eksplozive, lëndë djegëse, armë zjarri dhe një motomjet të dyshuar të vjedhur, pa targa.
Në momentin e ndalimit, ai kishte vendosur maskë silikoni.
Sekuestrohen sasi lënde eksplozive (gati për shpërthim), 10 litra lëndë djegëse, 1 armë zjarri (pistoletë) me municion, 1 maskë silikoni dhe 1 motomjet pa targa (i dyshuar i vjedhur).
Si rezultat i vigjilencës së shtuar të shërbimeve të Policisë së Tiranës, për garantimin e sigurisë së qytetarëve, si dhe falë intensifikimit të kontrolleve dhe administrimit të informacioneve në rrugë operative, shërbimet e Komisariatit të Policisë Nr. 5, në bashkëpunim me specialistët e Seksionit për Hetimin e Krimeve të Rënda, finalizuan operacionin policor të koduar “Kontigjenti”.
Gjatë operacionit, i është bërë shenjë ndalimi motomjetit pa targa, me të cilin lëvizte shtetasi P. D., 37 vjeç, banues në Paskuqan.
37-vjeçari nuk i është bindur urdhrit të Policisë, por ka vijuar lëvizjen me shpejtësi, me motomjet.
Si rezultat i ndjekjes policore, është bërë kapja dhe arrestimi i tij, në afërsi të liqenit të Paskuqanit.
Në momentin e ndalimit, është konstatuar se 37-vjeçari kishte vendosur maskë silikoni dhe gjatë kontrollit fizik dhe në motomjet, shërbimet e Policisë i gjetën sasi lënde eksplozive, gati për shpërthim, 10 litra lëndë djegëse dhe 1 armë zjarri (pistoletë) me municion.
Nga hetimet e mëtejshme dyshohet se shtetasi i arrestuar, P. D, më datë 03.10.2025, në rrugën “Besim Cera”, Paskuqan 1, ka qëlluar me armë zjarri në drejtim të banesës së shtetasit Q. K., dhe më pas ka djegur automjetin e përdorur gjatë kryerjes së krimit, në afërsi të urës së fshatit Tapizë, si dhe më datë 17.10.2025, në rrugën “Unaza e Madhe”, Paskuqan 2, ka hedhur një sasi lënde plasëse në banesën e shtetasit Rr. D., ngjarje nga e cila janë shkaktuar vetëm dëme materiale.
Më tej, dyshohet se motomjeti me të cilin 37-vjeçari u konstatua duke lëvizur gjatë natës, në rrugën “Mustafa Lita”, është i vjedhur.
Nën drejtimin e Prokurorisë, vijon puna intensive për identifikimin dhe kapjen e bashkëpunëtorëve të mundshëm të 37-vjeçarit, si dhe për zbardhjen e ngjarjeve të tjera kriminale në të cilat mund të jetë përfshirë ai.
Materialet procedurale iu referuan Prokurorisë së Tiranës, për veprime të mëtejshme.
/Versus.al
