Tiranë- Shqipëria mund të presë 40% më shumë turistë krahasuar me sezonin e kaluar turistik. Shifrat i bëri me dije ministri i Brendshëm Taulant Balla gjatë një konference për mediat ku prezantoi edhe masat që do të ndërmerren për mbarëvajtjen e këtij sezoni turistik.
Balla bëri me dije se këtë vit risi do të jetë edhe pjesa që lidh tre shërbime publike përmes Trupës së Ndërhyrjes Teknike, bëhet fjalë për Policinë e Shtetit, Shërbimin Zjarrfikës dhe Shpëtimit, si dhe Urgjencën Kombëtare.
Ndërsa sa i takon angazhimit të policisë, ministri tha se do të ketë 1600 efektivë për shërbim në zonat turistike duke bërë theksuar se për monitorimin e trafikut në zonat me më së shumti lëvizje, do të përdoren dronë.
"Do të përdorim dronët edhe për monitorimin e trafikut në pikat e nxehta, për të pasur një informacion të detajuar gjatë 24 orëve të ditës, për të gjitha dhe për të njoftuar publikun në rastet e nevojës për të shmangur pika të caktuara të nxehta me një trafik të shtuar"- shtoi Balla ndër të tjera.
