Autoritetet franceze arrestuan mbrëmjen e së shtunës dy persona të dyshuar për grabitjen spektakolare në Muzeun e Luvrit, pas një hetimi të imtësishëm që u mbështet në pamje nga kamerat e sigurisë, analiza ADN-je dhe të dhëna telefonike, sipas një burimi policor që citohet nga gazeta Le Figaro.
Sipas prokurores së Parisit, Laure Beccuau, janë kryer rreth 150 marrje mostrash ADN-je, gjurmësh gishtash dhe provash të tjera në vendin e krimit. Autorët kishin lënë pas disa objekte, të cilat rezultuan vendimtare për identifikimin e tyre.
Të dy të dyshuarit ishin nën vëzhgim prej disa ditësh dhe, sipas policisë, nuk ishin të panjohur për autoritetet. Ata konsiderohen grabitës me përvojë që mund të kenë vepruar me porosi, ndërsa dyshohet se janë përfshirë edhe në raste të tjera të ngjashme.
Mediat franceze raportojnë se njëri nga të arrestuarit u kap në aeroportin Charles de Gaulle, teksa po përgatitej të hipte në një avion me destinacion Algjerinë. Ndërsa sipas Paris Match, i dyti u arrestua pothuajse në të njëjtën kohë në banesën e tij në zonën Seine-Saint-Denis, afër Parisit, dhe kishte planifikuar të udhëtonte drejt Malit.
Gjatë arratisjes nga muzeu, katër grabitësit kishin lënë pas një sërë objektesh, mes të cilave dy sharra prerëse, një ndezës, bidona me benzinë, doreza, një radio, një jelek të verdhë dhe një batanije.
Megjithëse dy nga katër të dyshuarit janë arrestuar, sipas burimeve policore, sendet e vjedhura – me vlerë rreth 88 milionë euro – vazhdojnë të jenë të zhdukura.
Ndërkohë, një pjesë e koleksionit të bizhuterive që nuk u grabitën dhe ekspozitat më të vlefshme të Luvrit janë transferuar në Bankën e Francës, në thesare nëntokësore 26 metra nën tokë, aty ku ruhen edhe rezervat kombëtare të arit. Në të njëjtin vend ruhen gjithashtu ditarët e famshëm të Leonardo da Vinçit, me një vlerë të vlerësuar mbi 600 milionë euro.
Ministri i ri i Brendshëm, Laurent Nunez, shprehu përmes platformës X (ish-Twitter) “urimet më të përzemërta” për oficerët e policisë “që punuan pa u lodhur” për arrestimin e dy autorëve. Ai theksoi gjithashtu se “hetimet duhet të vazhdojnë nën respekt të plotë të fshehtësisë hetimore”, e cila po zhvillohet nën mbikëqyrjen e Prokurorisë së Posaçme Ndërrajonale të Parisit.
