Një fëmijë 12-vjeçar, i cili ishte shtruar në spital pas një sulmi nga peshkaqeni në gjirin e Sydneyt, ka ndërruar jetë si pasojë e plagëve të rënda, njoftoi të shtunën familja e tij. Ngjarja ka rritur edhe më tej shqetësimin publik, në një periudhë të shënuar nga një seri sulmesh të tilla në Australi.
Viktima, Nico Antic, ishte sulmuar rëndë të dielën e kaluar nga një peshkaqen-bulldog, ndërsa po hidhej nga një shkëmb për të notuar me miqtë në një gji të qytetit më të madh australian.
Pas sulmit, ai u transportua me urgjencë në spital në gjendje kritike.
“Jemi të shkatërruar të njoftojmë se djali ynë, Nico, ka ndërruar jetë”, deklaruan prindërit e tij, Lorena dhe Juan, në një komunikatë prekëse për mediat. Nico ishte një djalë i lumtur, shoqëror dhe sportiv, i mbushur me mirësi dhe bujari. Ai gjithmonë rrezatonte jetë dhe kështu do ta kujtojmë përgjithmonë.”
Kjo ngjarje shënon sulmin e tretë vdekjeprurës nga peshkaqenët në Sydney që prej muajit shtator. Pas saj, janë regjistruar edhe tre sulme të tjera jo fatale brenda 48 orëve në shtetin e Nouvelles-Galles du Sud, duke detyruar autoritetet dhe ekipet e shpëtimit t’u bëjnë thirrje qytetarëve të shmangin plazhet. Si masë sigurie, shumica e plazheve në rajon janë mbyllur përkohësisht.
Ekspertët përmendin disa faktorë që mund të shpjegojnë rritjen e sulmeve nga peshkaqenët. Shtimi i numrit të njerëzve në ujë, si dhe rritja e temperaturave të oqeaneve, që ndikojnë në modelet migratore të peshkaqenëve, konsiderohen elementë kyç. Për më tepër, reshjet e shumta të ditëve të fundit kanë turbulluar ujin, duke krijuar kushte ideale për peshkaqenin-bulldog, sipas organizatës së shpëtimit detar Surf Life Saving New South Wales.
Ndërkohë, të martën, një surfer është kafshuar nga një peshkaqen dhe ka pësuar lëndime të lehta, duke shënuar sulmin e katërt brenda dy ditëve në këtë shtet australian.
