Donald Trump pritet të ndalojë qytetarët nga 43 vende të udhëtojnë drejt SHBA-së.
Memorandumi dramatik parashikon gjithashtu që aleatët kryesorë të Moskës të vendosen nën sanksione të rënda, ndërsa udhëtarët bjellorusë mund të shohin ëndrrat e tyre për të udhëtuar drejt Amerikës të shkatërrohen, raporton New York Times.
Propozimet shpërthyese për emigracionin vijnë ndërkohë që presidenti amerikan po përballet me Putinin dhe Zelenskyn për një armëpushim në Ukrainë – duke paralajmëruar mbrëmë se Lufta e Tretë Botërore mund të ‘shpërthejë shumë lehtë’ nëse dështojnë bisedimet për paqe.
Së bashku me shtetin në luftë, një numër i madh vendesh nga e gjithë bota janë paralajmëruar se qeveritë e tyre kanë 60 ditë kohë për të adresuar mangësitë ose do të mbeten në listë.
Një memorandum tregon se vendet janë ndarë në tre grupe të veçanta – duke përfshirë ndalime të plota vizash dhe pezullime të pjesshme.
Shumë prej tyre janë nga Lindja e Mesme dhe Afrika, me Afganistanin, Kubën, Iranin dhe Korenë e Veriut mes 11 vendeve që përballen me masat më drastike.
Në grupin e dytë, 10 vende do të përballen me pezullime të pjesshme që do të ndikojnë vizat turistike dhe ato studentore, si dhe vizat e tjera për emigrantë, me disa përjashtime.
Ndërsa në grupin e tretë, gjithsej 22 vende do të konsiderohen për një pezullim të pjesshëm të lëshimit të vizave amerikane nëse qeveritë e tyre ‘nuk bëjnë përpjekje për të adresuar mangësitë brenda 60 ditëve’, thuhet në memorandum.
Një zyrtar amerikan paralajmëroi se mund të ketë ndryshime në listë dhe se ajo ende nuk është miratuar nga administrata, përfshirë Sekretarin Amerikan të Shtetit, Marco Rubio, pasi u raportua nga New York Times.
Për shumë njerëz në Amerikë, kjo politikë sjell ndër mend ndalimin shpërthyes të Trump për ‘myslimanët’ gjatë mandatit të tij të parë. Disa nga vendet në propozimin e ri ishin gjithashtu në listën e vitit 2017, por tani janë shtuar edhe shumë të tjera. /Versus.al/
