56 kufoma u gjetën në një varrezë masive në veri të Meksikës, pranë kufirit me Shtetet e Bashkuara, tha të shtunën zyra e prokurorit përgjegjëse për hetimin. Trupat u zhvarrosën në shtetin Chihuahua mes të martës dhe të premtes, me mbështetjen e ushtrisë, sipas njoftimit për shtyp nga zyra e prokurorisë rajonale, pa asnjë detaj mbi identitetin e mundshëm të viktimave. Grupet kriminale trafikojnë drogë, armë dhe emigrantë në këtë pjesë të Meksikës.
Hetuesit gjetën trupa, skelete të plota dhe kocka të shpërndara, gëzhoja plumbash dhe veshje. Eshtrat u dërguan në laboratorët e mjekësisë ligjore për të përcaktuar “shkaqet dhe kohën e vdekjes, si dhe identitetin e viktimave ”, shtoi prokuroria. Prokuroria mori përsipër “ të ofrojë siguri ligjore për familjet e viktimave”. Trupat u zhvarrosën në një vend të njohur si "El Willy ", i kontrolluar nga grupi kriminal La Linea, "një nga degët e armatosura" të kartelit Ciudad Juárez në kufi, sipas gazetës La Jornada.
Chihuahua është goditur prej vitesh nga dhuna e lidhur me krimin e organizuar në një rrugë kontrabande droge dhe emigrantësh për në Shtetet e Bashkuara. Më 26 dhjetor, të paktën 12 trupa u gjetën në disa varre rreth dy orë nga qyteti kufitar i Ciudad Juárez. Varret masive nuk janë të rralla në të gjithë Meksikën, veçanërisht në zonat e rrënuara nga dhuna e karteleve. Ka mbi 345,000 njerëz në Meksikë që janë raportuar të zhdukur, sipas regjistrit kombëtar të vendit.
Që nga dhjetori 2006, data e nisjes së një operacioni të diskutueshëm ushtarak kundër drogës, Meksika numëron më shumë se 450,000 vdekje të dhunshme dhe dhjetëra mijëra zhdukje, sipas shifrave zyrtare
