Pas një divorci të bujshëm që u diskutua jo pak në skenën publike shqiptare, aktorja dhe shkrimtarja Elia Zaharia rrëfen për herë të parë si e përballoi fundin e një dashurie që dikur dukej si përrallë e vërtetë.
Aktorja e njohur Elia Zaharia ishte këtë të shtunë e ftuar në emisionin “ArtKand” në Top Channel, ku prezantoi librin e saj të ri për fëmijë, me titullin simbolik “Perla dhe Dreri i Artë”. Një histori që, sipas vetë autores, lindi në një periudhë personale të trazuar dhe të mbushur me kakofoni emocionale.
View this post on Instagram
Por ajo që e bëri edhe më të veçantë intervistën, ishte momenti kur gazetarja Jetona Koçibelli i bëri një pyetje direkte për ndarjen e saj me Princ Lekën – një divorc që për muaj me radhë ka qenë në qendër të vëmendjes mediatike dhe që solli në sipërfaqe jo pak tensione mes ish-partnerëve.
“E gjithë jeta ka sfidat dhe ulje-ngritjet e veta. Nuk është asnjëherë betejë e fituar, sepse jeta të rrezon dhe të ngre. Ajo që ka rëndësi është që sa herë të ngrihesh, të mos harrosh të ngrihesh si njeri. Sepse dhimbja dhe sfidat e shuajnë ndonjëherë dritën dhe dashurinë që duhet t’i japim jetës, njerëzve, punës… dhe unë këtë jam munduar të bëj,” u shpreh Elia me një ton të thellë emocional.
Fund i një përralle me kurorë mbretërore
Elia Zaharia dhe Princi Leka i II-të, trashëgimtari i vetëshpallur i fronit mbretëror shqiptar, ishin një nga çiftet më të komentuar të jetës publike në Shqipëri. Ata kurorëzuan dashurinë e tyre në një ceremoni madhështore në vitin 2016, ku të ftuar ishin personalitete nga familjet mbretërore europiane dhe figura të rëndësishme nga politika dhe arti.
Por pas më shumë se një dekade bashkë, martesa e tyre përfundoi me një divorc të bujshëm në vitin 2024, i cili nuk kaloi pa zhurmë. Mediat raportuan për përplasje të hapura, mosmarrëveshje për çështje familjare dhe menaxhimin e trashëgimisë së familjes Zogu.
Burime pranë çiftit në atë kohë bënin me dije se ndarja kishte ardhur pas një periudhe të gjatë tensioni, ku mungesa e vizionit të përbashkët për të ardhmen dhe presioni i vazhdueshëm publik kishin ndikuar ndjeshëm në marrëdhënien e tyre.
Rikthim me një mesazh për shpresë
Pavarësisht dhimbjes së një ndarjeje që nuk ishte vetëm personale, por edhe publike, Elia duket se ka zgjedhur ta kanalizojë gjithë përvojën e saj në krijimtari. “Perla dhe Dreri i Artë” është një vepër që i flet ndjeshmërisë së fëmijëve, por që, sipas saj, ka mesazhe të thella edhe për të rriturit, për ata që janë rrëzuar dhe kanë nevojë të ngrihen sërish.
