Për ata që e kanë parë serialin Absolutely Fabulous , Lynne Franks nuk është e panjohur pasi ajo ishte frymëzimi për personazhin e protagonistes Edina Monsoon - megjithëse, siç thotë ajo, jeta e saj e vërtetë ishte edhe më e çuditshme dhe shpërthyese!
E njohur kryesisht për punën e saj në marrëdhëniet me publikun dhe më vonë për përkushtimin e saj ndaj kauzave të fuqizimit dhe barazisë femërore, pak njerëz e dinë se ajo është kryesisht përgjegjëse për krijimin e Javës së Modës në kryeqytetin anglez.
Duke filluar agjencinë e saj të PR në moshën 21 vjeç, Franks vazhdoi të përfaqësonte disa nga stilistët më premtues të epokës, përfshirë Vivienne Westwood , John Galliano-n ekscentrik dhe "fëmijën e tmerrshëm" të industrisë, Jean-Paul Gaultier, ndërsa punoi edhe me klientë, përfshirë dyqanin e famshëm Harvey Nichols dhe Këshillin Britanik të Modës.
Falë saj dhe iniciativave të saj, Anglia u lidh në mënyrë të pazgjidhshme me inovacionin e modës dhe të ashtuquajturin stil Cool Britannia.
Duke njohur atë që ishte tashmë e themeluar në Paris dhe Nju Jork si Javët e Modës, dhe me dëshirën për të mbështetur dhe shfaqur talentin e stilistëve me bazë në Londër, ajo imagjinoi një Javë Mode lokale.
"Po kërkoja një vend për të ngritur tendën time dhe përfundimisht e gjeta vendin në Institutin e atëhershëm të Komonuelthit, tani Muzeu i Dizajnit në Holland Park. Kishte një oborr të madh dhe hapësira të brendshme. Pastaj, sigurisht, më duhej të gjeja një mënyrë për të paguar për këtë tendë..." është shprehur Franks.
Duke iu drejtuar njërit prej klientëve të saj, Mohan Murjani, Franks siguroi sponsorizimin e nevojshëm dhe kështu u krijua Java e parë e Modës në kryeqytetin anglez në vitin 1983.
Disa nga stilistët që morën pjesë ishin: John Galliano , BodyMap, Betty Jackson. Ajo vetë mori përsipër marrëdhëniet me publikun, programet, sponsorizimet dhe eventet, ndërsa institucioni filloi të konsolidohej me kalimin e viteve dhe të ndryshonte vendet dhe formatin.
Pas njëzet vitesh suksesi në modë dhe menaxhimit të qindra klientëve të mëdhenj dhe të pavarur, ajo vendosi ta mbyllte kompaninë e saj për t'u përqendruar në diçka që tani e konsideronte më thelbësore: një jetë më të ekuilibruar, me fokus në fuqizimin e grave dhe një shoqëri më të drejtë.
Për kontributin e saj të përgjithshëm në biznes, modë dhe fuqizimin e grave , asaj iu dha titulli OBE nga Princi i Uellsit në një ceremoni në Pallatin Buckingham më 6 qershor 2018.
Ndërsa ndjekim Javën e Modës në Londër nga sot dhe në ditët në vijim, do të kujtojmë gruan që qëndron pas këtij institucioni./Versus.al
