Kosovë- Bahtjar Bajraktari i njohur ndryshe si “Dj Crax” është liruar nga burgu pas disa muajsh në qelinë e paraburgimit të Tiranës. Vendimi është marrë nga gjykata e Pejës e cila ka caktuar “detyrim paraqitje” një herë në javë në stacionin policor.
“I njëjti me urdhër-arrest të Prokurorisë Themelore në Pejë është arrestuar në Republikën e Shqipërisë dhe ka qëndruar mbi 70 ditë në paraburgim atje. Është ekstraduar nga Republika e Shqipërisë dhe i njëjti është ndaluar fillimisht për 48 orë pas intervistimit dhe njëkohësisht Prokurori i Shtetit ka kërkuar që i njëjti të paraqitet një herë në javë në stacionin policor”, bën me dije policia.
Bajraktari i cili njihet edhe si Dj zyrtar i këngëtarit Rigels Rajku me emrin e artit “Noizy”, së bashku me këtë të fundit gjatë muajit gusht u përfshi në një sherr të ashpër në një klub ku po performonin. Të dy së bashku me disa persona të tjerë akuzohen se kanë dhunuar brutalisht Tik Tok-erin Medi Iseni pasi ky i fundit kishte hyrë në prapaskenë. Disa ditë pas ngjarjes u arrestua në Shëngjin reperi Noizy i cili qëndroi në burg vetëm pak ditë për t’u liruar në këmbim të garancisë 50 mijë euroshe. Në kërkim ende për këtë çështje është Arkimed Lusha i njohur si “Stresi”. Versus.al
