Tiranë- Ditën e sotme deputetët e Kuvendit të Shqipërisë i rikthehen punës dhe rutinës së tyre politike pas më shumë se një muaji pushimesh.
Në seancën e parë të sesionit parlamentar që do të mbahet ditën e sotme, pritet të diskutohen objektivat për këtë sezon politik. Fillimisht në nisje të seancës në orën 17:00 do të mbajë fjalën kryeparlamentarja e re e Kuvendit, Elisa Spiropali.
Më pas do të pasohet nga fjalime të kryetarëve të grupeve parlamentare, Niko Peleshi i PS, Gazment Bardhi i PD, Mesila Doda e PDIU dhe Agron Duka i Aleancës për Ndryshim. Çështjet e lëna pezull që pritet të diskutohen në nisje të këtij sesioni parlamentar janë të shumta, mes tyre mandati i deputetëve Vullnet Sina dhe Olta Xhaçka.
Mocioni për kërkesën e PD për heqjen e mandatit të Sinajt do të shqyrtohet më 4 shtator nga Këshilli i Mandateve. Ndërsa për Olta Xhaçkën më 12 shtator, diskutohet dhe votohet në Kuvend për herë të dytë lidhur me urdhrin e Gjykatës Kushtetuese që kërkon që parlamenti t’i kalojë për shqyrtim mandatin e Xhaçës nën dyshimin se kjo e fundit gjendet në konflikt interesi për shkak se bashkëshorti i saj është shpallur investitor strategjik nga qeveria.
Po ashtu opozita ka bërë një kërkesë për interpelancë urgjente me kryeministrin Edi Rama sa i takon lajmit që bëri jehonë ndërkombëtare, atë të transportit ndërkombëtar të mbetjeve toksike nga Porti i Durrësit. Versus.al
