Skandali i mbetjeve toksike të kompanisë KURUM, të cilat raportohet se janë tregtuar nga kompania “Sokolaj” drejt Azisë, përkatësisht Singapor dhe Tajlandë, do të jetë në qendër të debatit politik në Kuvendin e Shqipërisë.
Gjatë seancës që do të zhvillohet nesër, është parashikuar të mbahet një interpelancë e kërkuar nga deputeti Gazment Bardhi me kryeministrin Edi Rama. Kjo interpelancë është një përgjigje ndaj fakteve të bëra publike për transportin e paligjshëm të mbetjeve të rrezikshme drejt Kinës dhe Tajlandës.
Burime bëjnë me dije se kryeministri Edi Rama do të jetë vetë i pranishëm në këtë interpelancë për të sqaruar situatën dhe për të dhënë përgjigje ndaj akuzave.
Në kërkesën për interpelancë, thuhet se rastet e përsëritura të eksportit të mbetjeve toksike krijojnë dyshime të forta mbi përfshirjen e Shqipërisë në tregtinë e paligjshme ndërkombëtare të mbetjeve të rrezikshme. Partia Demokratike (PD) kërkon që qeveria shqiptare të informojë Kuvendin dhe opinionin publik mbi këtë çështje, duke përfshirë detaje mbi origjinën e mbetjeve, destinacionin dhe çdo informacion tjetër që lidhet me këtë aktivitet të dyshuar.
Kjo çështje ka shkaktuar shqetësim të gjerë dhe është vënë në qendër të vëmendjes publike, ndërsa opozita kërkon transparencë të plotë për të sqaruar rolin e qeverisë në këtë skandal dhe për të siguruar përgjegjësi për çdo shkelje të mundshme.
