Policia ka zhvilluar sot (25 maj) kontrolle në disa banesa të qyteteve të ndryshme të vendit në kuadër të vijimit të operacionit të djeshëm ku u gjetën 10 pistoleta dhe municion luftarak.
Katër të rinjtë e arrestuar ditën e djeshme nga policia e Tiranës nën akuzën e trafikut të armëve të zjarrit, kanë rrëfyer në polici se armët që u gjetën në një autobus të linjës Prishtinë-Tiranë, prodhoheshin në Çeki ndërsa vetë ata i blinin në Serbi.
Blerim Krasniqi, Benjamin Shala, Edonis Thaçi dhe Muhamet Krasniqi kanë deklaruar se flisnin me serbë për të blerë armët e zjarrit.
Dyshohet se armët ishin shitur në disa qytete të vendit me çmime nga 1500 deri në 3 mijë euro ndërsa kishin si destinacion final Greqinë ku do të përdoreshin nga grupet kriminale.
