Prokuroria e Posaçme sot ka thirrur për të marrë në pyetje Zabit dhe Agim Dedën, dy vëllezërit e Hekuran Dedës, njërit prej 4 protestuesve që u vra me armë zjarri gjatë protestës së 21 janarit 2011.
Thirrja e vëllezërve Deda vjen pas 14 vjetorit të ngjarjes së rëndë, ku edhe kryeministri Edi Rama pati një thirrje të qartë ndaj SPAK e GJKKO sa i takon kësaj ngjarje, duke e konsideruar si “turp për Reformën në Drejtësi” kohën që kalon pa u dhënë drejtësia e munguar për 21 janarin.
Gjykata e Strasburgut, në përgjigjie të denoncimit të bërë nga familjarët e Aleks Nikës, njërit prej protestuesve të vrarë, e cilësoi ngjarjen si “krim shtetëror”. Kjo bëri që Gjykata e Lartë të urdhërojë SPAK-un që të nisë hetimet për vrasjen e 4 protestuesve, për të zbardhur rolin e drejtuesve të lartë shtetërorë si ministri i Brendshëm Lulzim Basha dhe kryeministri i asaj kohe Sali Berisha.
Deri më tani janë marrë në pyetje ish-drejtues të policisë që kishte për detyrë mbajtjen e rendit në atë protestë si dhe deputetë socialistë të pranishëm në turmën e protestuesve para kryeministrisë.
Më 21 janar 2011 një numër i madh protestuesish u mblodhën para kryeministrisë pas videoskandalit të publikuar ku zv.kryeministri i asaj kohe Ilir Meta shfaqej duke kërkuar ryshfet 700 mijë euro. Teksa në protestë pati përplasje mes qytetarëve dhe policisë, tragjedia u shënua kur u hap zjarr drejt protestuesve nga anëtarët e gardës duke lënë të vdekur protestuesit Hekuran Deda, Aleks Nika, Ziver Veizi dhe Faik Myrtaj.
Në SPAK është dorëzuar audiopërgjimi ku pretendohet se urdhri për të hapur zjarr drejt protestuesve është dhënë nga zinxhiri i lartë drejtues. Versus.al
